法國巨星

法國巨星係我join那間台灣婚紗相的公司名，哈哈，係咪好勁呢個名。

返來幾個星期，終於有Mood寫下台灣之旅的趣事，對上一次去台灣已經是八、九年前喇，估唔到台灣冇乜點變。

第一日到步，返酒店放低行李，我地已經去了捷運的中正紀念堂站附近的「法巨」試衫，下面張寶麗來，係6月在婚展報名時被工作人員拍下存檔的，所以我地一入到店，他們已知我地兩條友仔係來試衫，店入面的員工好熱情，台灣人真係好熱情，直頭係湧出來歡迎我地。

一去到就要澎澎聲搵衫，我揀衫的速度好快，基本上一掃就知道邊件得，（情況就好似平日幫明星借衫，最緊要快，唔好踩死蟻！）用廿分鐘揀走均幾個衣帽間，揀左五六件白紗同六七件晚裝，試衫姐姐跟埋我入Fitting Room，佢動作好快，我一扯高條裙，佢就即刻幫我拉拉鏈，手勢好Pro。

揀好衫後，改衫姐姐即場幫我度身，改到Fit為止，最無奈是我由香港帶過去的Girdle，他們不准我穿，但我又沒帶穿晚裝合用的Bra，結果當晚在西門町的內衣店搵，但都買不到，結果.........買不到Bra，而係買了一條收腹／打底褲，哈哈，貪結婚都可以著得番。

第二朝，在酒店嘆完早餐，就搭捷運去法巨喇，晨早八點，大家睇睇我個樣，成條喪屍咁，下圖呢位係我的造型師，佢真係幾靚女，身材又好，我問左佢好多台灣的野，佢話西門町有一間麻辣火鍋一家要吃，但我最討厭火鍋，最後都冇去！

化完妝，同攝影師傾完行程之後，就開車啦，原來攝影師要做埋司機，佢先車我地去陽明山莊，影影影，影到中午再出發去大屯農場，食中飯前，造型師M小姐幫我轉妝，經過陽明山莊爬早爬低之後，我已經累到暈，又肚餓，加上春田國語只有3歲程度，但又不停同攝影師交談要我翻譯，真係累爆。

我頭上的兩隻蝴蝶，真係好台灣味，但當時我唔知發生咩事，因為冇得照鏡！

影完農場，又去左幾個地方影，搞到成七點先返到法巨影內棚（即影樓），影和服都幾好玩，走之前同春田在歡迎牌前合照，上面寫左我地兩個名架！

（未完）