Sa Wa Di Ka ~ Day 3

無理由日日都唔食早餐, 今日教定鬧鐘落酒店食完早餐, 食完去 Big C 掃一掃零食, 之後原本想去游水, 點知見個天好陰, 而且仲有雷聲, 於是就冇去游  點知到我再出發時都未落過雨, 激氣  

下晝去左遊船河呀 原本只係打算搭幾個站就可以去唐人街, 不過坐落又唔想落船, 諗住坐多一陣先返轉頭, 點知搭搭下愈來愈遠, 自己去左邊都唔知, 只係沿湄南河一直去. 最後搭左成個鐘先去到總站碼頭, 跟住再搭返轉頭去唐人街落

落左船行下行下就去到唐人街, 好多金行, 食翅, 燕窩0既地方.  我哋去左 T&K食, 當然樣樣都試下啦, 翅,蟹, 炒蜆, 燕窩, 冬陰公 ..... GOOD, 好味道  香港人當然要買一買林真香啦, 仲要係老鋪, 好味D 

就0係林真香門口睇緊地圖, 打算坐Tuk Tuk去MRT站 (未坐過, 想試下) 好快有個伯伯已經駛埋黎, 講好價又有地圖指引就開心咁上車.  行呀行, 兜呀兜, 突然間停車話已經到左.  吓, 我唔係去拜神喎 唔知點解會誤會, 再比個圖佢睇, 佢好似唔多識去喎, 要去問人, 問完人再上車就話OK, 識路喇, 點知轉頭話要加價.  嘩, 咁都得 算, 豪比你, 最緊要安全到達, 真係驚險

去旅行好似特別快肚餓, 返酒店放低野一陣又去食雪糕, 今次仲要食雪糕火鍋, 哈哈, 睇都開心呀. 食完雪糕, 冰冰又走去睇街邊野食, 買串燒, 都話去旅行時特別開胃架啦