倒數4個月

今日倒數4個月，有幸同左譚氏伉儷一齊過，又去左佢地屋企打攪，欣賞左靚靚的結婚相同mv，好正，好精彩。我想講，你們的努力是值得的，到依家我仍然好回味!!另外，仲收到佢地比我的回禮禮物，真係開心呀，咁都記得留返兩份比我地，再加神秘禮物，真係有心呀!!謝謝你們呢!

今個月做左好多野呀，最大的進展就係開始左裝修的工程!!

最辛苦的選擇材料大已完成，接下來應該睇下師傅手工做得好唔好

上一篇講完試菜，今篇講下其他已經做妥的零零碎碎項目-

1.-

9月尾時，到美華租了裙掛，本來一心想造租，不過wg又係造，唔好咩都造啦，太貴，要慳d，乖d，所以最後都選擇租，款式係掛后，男朋友當堂安心晒

男朋友又試左馬掛，我覺得好型仔呀，佢仲考慮緊著唔著佢試緊馬掛時，問個老闆娘「馬掛有無得造租，我想貼身d」

我即反駁「你又唔想我造，自己又貪靚造」

個老闆娘見到我咁講，立即打完場「兩個都唔好造，租就得啦，租都好靚啦，我都唔建議你地造呀!」

唸返起都覺得好好笑呀，男朋友其實都好貪靚，我地係依方面，真係夾呀

我估男朋友應該會肯著馬掛，希望唔係我一廂情願啦。男朋友，你見字請快d confirm

2.-

9月尾時，我買左個頭紗，一個好靚好鐘意的3層水晶長頭紗。我覺得佢同the one係絕配，好期待自己穿上它們的樣子

3.-

10月頭放中秋節，我地返左廣州買結婚物資，人地個個都去深圳，我地就去咁遠，因為我爸爸係中秋節生日，佢去左廣州，所以去陪下佢，順便一齊過節。

廣州的婚紗街，我唔知叫咩名呀，只係識搭地鐵係「市二宮」站落車，之後就會見到成條街都係買結婚d野。可能係因為中秋節，佢地好早閉門，我地又成4點幾先去到，唔係好多時間行，衝衝忙忙咁買左少少野

上圖就係我地所買的東西，大約花費300百人仔。其他未買的東西，遲d可能要去金都買埋佢。

4.-

11月初，我終於的起心肝，去訂造旗抱。一開始籌備結婚時，都知道自己想係敬酒時穿上紅色旗抱，亦睇左幾間做旗抱的店，但沒有水心，之後又忙，一直都無理過旗抱依個ITEM，拖到11月，知道唔可以再拖，就快快手手攪埋佢。其實我咁遲都唔攪既原因係，早幾個月前，我已暗中物色了Blogger RG做旗抱的商店-「金多寶時裝」，大家唔好睇佢個名好似好leung，但我去到覺得佢d款都ok，個c傅一入去就知道我做旗抱for結婚用，主動介紹左幾個款的試，試完覺得ok，立即confirm。一月就可以試身，到時決定做唔做埋釘工，做的機會應該很大。謝謝RG的資料及Katie的協助，我再次講價成功!

5.-

係造旗抱的過程中，個c傅係咁介紹男朋友做套衫，於是，就激發起男朋友想做一套中山裝，男朋友話見我造衫造得咁開心，佢又想造一套喎。哈哈，既然你想，我一定唔會阻止的依家佢就物色緊去邊間做中山裝，如果搵唔到更好，佢就返「金多寶時裝」造一套。

6.-男朋友係11月初，去左cocoon confirm左男禮的款式，佢只會著一件黑色男禮。男朋友唔鐘意燕尾，佢覺得平腳型仔d，所以選擇左平腳款。其實我覺得燕尾都好睇，又隆重d，不過男朋友覺得唔一定燕尾先隆重。其實佢鐘意著d都無問題，只係佢鐘意就得，所以我尊重佢既決定，最重要你鐘意!到時你一定最型仔的!

7.

book左出門酒店-Hyatt Regency Hong Kong, Sha Tin ，方便出門入門，去男家只需約5分鐘車程，而且又方便去中大影相，一舉兩得!!!

8.

忘記左，10月尾時，第一次約左所有兄弟姊妹出來食飯，是次目的只是希望大家互相認識，遲d定左再約出黎傾詳細rundown。依家已經約左姊妹下星期出黎睇姊妹衫，到時confirm埋，又攪點一樣，唸起都開心!!

餘下4個月，其實仲有好多野未做妥，希望能盡量做好，加油!!大家都加油呀!!