感受~~

不經不覺距離預產期真係不遠啦...由於之前醫生講過小bb應該會比預產期早出世,所以我一直覺得小bb好快出黎..點之等呀等...日日都覺得有可能的情況...心情又緊張...呢兩個星期真係好煎熬...依家我覺得轉眼間懷胎十月的時間真係過得好快,反而係今個月d時間最難過...因為每日都好期待小bb的來臨...

呢兩個星期個人特別倦...好似瞓極都唔夠咁..但都唔敢瞓得太晏..因為我見好多人都係清晨開始作動...所以我都早D起身食定早餐,沖定涼...而呢兩個星期最大變化就係可能個肚越來越大,所以個人都唔係咁想郁..加上行行下又抽筋...就係因為咁,我更加想小bb你快快出黎..咁媽媽可能會舒服D...

最近上網睇到好多不同媽媽的生產分享...有D媽媽要痛好多個鐘或者痛好幾日結果要催生或開刀...其實我真係越睇越大壓力...因為我真係唔想痛咁耐....我又怕自己頂唔順..其實我一向都忍得痛既..但似乎今次的痛真係唔野少..所以我都無法估計...依家唯有交比小bb同上天,希望一切都順利同平安,小b又健康就得架啦

依家仲有一個星期到,小bb最多都係住多一兩個星期都一定要出黎啦....你唔好再留戀媽媽個肚啦,因為媽媽已經準備左好多衫比你著同好多玩具同你玩...所以你快快轉個靚位啦!! 唔通我個肚真係咁温暖?? 咁啱今個星期係最凍,到時媽媽真係要抱到你實一實,包到你暖一暖,等你過一個暖暖既聖誕節~~