05.02.

    今日同G.Kay去咗睇《南京！南京！》。好震撼。出戯開始咗唔夠5min我就開始喊了，並唔係因爲一開頭好感人，我完全係嚇到喊，仲要係收唔到聲嗰种。一開始就已經係好多槍聲，我覺得好驚好驚，覺得自己好似就處身喺嗰場戰爭裡面咁，一种無法言寓嘅壓逼感喺個心口度，好辛苦。睇到後面，d軍人，d百姓，一陣嘅槍聲過後，一片人海由近至遠跌低……見到d女嘅俾d日本仔乜乜乜，然後有100個又俾d日本仔“借”走咗去做慰安婦3個星期，可惜3個星期之後，返嚟嘅之後幾個，而且咿幾個早就俾d日本仔蹂躪到不似人型……嗰陣我已經唔係單單咁流眼淚，我已經係喊咗出聲，周圍d人都望住我。其實我都驚會影響到人哋睇，但我眞係冇辦法控制自己，因爲實在太多太多嘢領到我感觸良多。
    但就喺我同G.Kay睇到喊到紙巾用咗一大包，大家都睇到心氣好沉重之際，坐喺我斜前面嘅一個女人竟然喺度笑！！！離曬譜！佢個女都冇笑啊，佢作爲個女仔嗰Mummy唔單止冇引導個女正確認識歷史，仲要摞命到喺度笑！！！我嬲到我爆粗！！我戒咗粗咁耐，係佢先可以咁勁逼到我爆返粗！佢根本唔配做一個中國人！！！竟然笑？！佢究竟知唔知佢咿家可以咁舒服嘆住空調睇電影都係因爲有嗰d軍人用自己嘅人頭同鮮血換返嚟o架？！d女嘅俾人捉去做慰安婦好笑咩？如果係佢，我睇佢點笑！d百姓同軍人俾人掃射死好笑咩？如果係佢，我懷疑佢嚇到瀨屎o添啊！咿出片係用嚟紀念南京大屠殺o架，唔係俾好似佢d咁嘅口話自己係中國人但係喺睇到同係中國人嘅百姓軍人俾日本仔殺害嘅時候當正睇戲劇咁喺度笑啊！佢根本唔配做中國人啊！
    睇完戲直到咿家，我嘅情緒都未有辦法恢復，覺得好壓抑，心情好down，個心好唔舒服。一方面係因爲d日本仔嘅毫無人性，當正中國人唔係人咁。睇到d中國百姓軍人被殘害殺戮，除咗喊住猛講唔好之外，我都唔知道點好，有d手足無措，成個人都好慌張，好驚，好似連手腳應該擺去邊都唔知道。成個腦一片空白，淨係識失控咁喊。一方面係因爲唔團結嘅中國人。記得有一幕，幾個日本仔入到一個教堂，裡面匿埋幾百個，嗰幾個日本仔見到咁好驚訝，而嗰幾百個中國人見到嗰幾個日本仔個個都露出驚恐嘅表情，繼而一個個中國人舉起雙手投降，甚至一個稚嫩嘅女童都跟住d大人咁做。仲有一幕就係一班國民黨兵對住另外一班築起人墻嘅國民黨兵講：“司令都逃跑了！放我們出去！”然後就奮力咁衝破人墻，爭先恐後咁爬出城門。咿兩幕另到我喊到收唔到聲。好心噏，好唔舒服。個個都怕死，個個都坐以待斃。如果當時嘅中國人可以團結一致，就唔至於有30万咿個咁血腥咁悲慘嘅數字出現。記得仲係喺華英嗰陣，校長講咗句嘢令到我好深刻，佢話，一個中國人係一條龍，一群中國人就係一條蟲。的確，有時中國人眞係太自私了。就好似戯裡面拉貝先生嘅secretary唐先生咁，拉貝要走嗰陣，佢以爲投靠日本人就可以保住自己屋企人，可惜到最後佢個女都係俾個日本仔dum咗落樓。雖然佢最後都知道自己做錯咗，將跟拉貝先生離開南京嘅咿條活路留咗俾自己老婆同另外一個人。但從唐先生咿個角色裡面就反映出中國人雖然好愛自己嘅家人，但卻自私。眞係好心噏，百感交集。
    出戯好多好震撼好感人但都好慘烈嘅場面，睇到我久久不能平復。睇完成出戯，我同G.Kay喊到眼又腫頭又痛。唉……CITY OF LIFE AND DEATH……
    好想睇埋《拉貝日子》，都係講南京大屠殺嘅，但唔知道有冇時間。
    唉……喺南京大屠殺中慘死嘅中國人，請安息吧。