係咁講

而家德德真係好好笑...尤其, 佢對當天發生在自己身上特別既事情, 會不斷重覆講比人聽, 令人覺得好煩, 又好好笑, 因為果d事, 真係好鬼芝麻綠豆, 唔知有咩咁好講.

今日搭巴士, 落車時, 混亂中, 爸爸見到有人跌左舊蕃薯在巴士上, 只係無心咁講左一句, 德德就好在意, 好掛住舊蕃薯.   一路行, 一路想返轉頭揾舊蕃薯.  我地當然氹住佢唔返去啦.

咁佢就一路行一路提住件事, 話有人跌左舊蕃薯...行街個几鐘, 係咁提住, 真係好鬼煩.  跟住, 返到屋企食飯, 見到姑姑又講, 見到嫲嫲又講, 見到爺爺, 又煞有介事講多几次...成餐飯就係講呢件事...真係頂佢唔順呀~~

之前有次又係.  佢好掛住party上同佢玩得好開心既Heidi姨姨, 仲因為咁喊左...咁佢成餐飯, 就係咁講比人聽佢好掛住Heidi姨姨...人地想講其他野都唔得, 係要講佢好掛住Heidi姨姨...真係救命...

總之而家係, 成日都哭笑不得...