小豬嘜 ~ 一路好走

一個月前...肥爸喺屋企附近嘅草叢...發現一隻只有幾個星期大嘅BB貓...可能因為冇嘢食...佢趴咗喺度唔識郁...肥爸即刻抱咗佢返屋企...餵佢食嘢...幫佢沖涼...經過肥爸悉心嘅照顧...好快就回復返精靈活潑...我同肥爸都好開心...因為我地又救多咗一隻貓仔...肥爸叫我幫佢改名...名為小豬嘜...

小豬嘜天生活潑好動...每次我同肥爸視像都會見到小豬嘜走嚟走去...佢又鍾意嗲肥爸...嗲到肥爸暈晒大浪...由於佢真係太得意...細佬啲朋友同貓姑姐個朋友都話想養...經我同肥爸嘅幾日嘅考慮...最後送咗比貓姑姐個朋友...其實肥爸問咗我幾次...好唔好自己養返...但係我唔想另外嗰三隻豬豬唔開心...因為肥仔之前試過吃醋而絕食...攪到要睇醫生...所以我地依依不捨將小豬嘜送比人...雖然佢嘅新主人幫佢改咗另外一個名...但我同肥爸每次提起佢...都會照舊叫佢小豬嘜...

尋日收到一個消息...小豬嘜入咗醫院...唔知咩原因...淨係知佢三日冇食嘢飲水...醫生話佢可能過唔到尋晚...本來想幫佢吊鹽水...但係因為佢太細...連條血管都搵唔到...我同肥爸都好擔心...為佢祈禱...

今朝我一起身...即刻打長途返香港...肥爸話仲未有消息...到下晏...我收到肥爸嘅短訊...話小豬嘜走咗...醫生話佢可能因為感冒...唔肯食嘢...而佢嘅新主人又去咗台灣...得返一個老人家照顧佢...可能因為唔識照顧而失救...好唔開心...肥爸好內疚同我講..."早知係咁...我自己養返啦..."...唉~雖然好唔開心...但係都唔可以怪其他人...因為我相信佢個新主人都一樣好唔開心...因為佢都為小豬嘜付出咗好多...

小豬嘜...希望你喺彩虹嘅另一邊...生活得開開心心...亦希望你同喺天堂嘅小肥同細佬B成為朋友...互相照應...我同肥爸永遠都會記得你...