去食囉！

復活節同兩個囝囝，加埋表哥一齊去大陸玩。今次主要係米高想試大飽口福自助餐，其實食對我嚟講真係無乜所謂，不過上大人叫到咪逆佢意，就去試試啦！都好甘架！咁當然比香港平。

係屋企去深圳灣新口岸真係超快，搭618小巴唔駛20分鐘就到，因為行西部通道。

今次住南山區新桃園酒店，又係好正，間房好大好乾淨。三個小魔怪又嚟個枕頭大戰，玩到儍晒！笑聲不絕！見到佢哋玩得咁放咁開懷，就知佢哋平日讀書真係好辛苦，辛苦你們啊！所以放假盡可能同佢哋郁動吓玩吓！呢個係我唔安排課外活動嘅原因。

聽講話大飽口福 book 咗位都要等，於是早啲起程去。由酒店去沿途都有天橋接駁，而且周圍環境好靚，大陸真係發展得好好。

唔望由自可，一望已經過百人係到等入，於是即刻揾個靚姐check下有無預留我哋嘅位，好彩。地方超大，有成500幾款嘢食，但味道一般，但係香港就無可能用咁嘅價錢，食到咁多嘢食嘅自助餐。個個食到攬住個肚。於是係附近行吓，南山區呢到Ｄ人有禮同守規矩好多，唔似羅湖咁雜，印象很好。

第二朝瞓醒就去南山書城睇書，同深圳書城比真係超正，地方又大又乾淨。打書釘打咗三粒鐘，個個聞咗好多書香。最後買左幾本顏色冊俾細Ｂ，佢瞇晒眼。

收拾行裝又搭番618小巴返，就係村口落車，用咗唔駛20分鐘，超方便！