中女媽媽

很久沒有寫blog了，終於花少少lunch時間，分享下希信的生活趣事:

 趣事一--- 中女媽媽:

週日一家坐車去街，途中聽港台一個節目:「中女、宅男」，我心想阿仔你最好聽唔到啦! 趕不及較細聲量，

阿仔已問: 「媽咪，咩叫中女?」

我本能地答: 中國女仔!

但我立刻覺得不可講大話，唯有直答: 中年女子!

阿仔: 咁即係幾歲?

媽咪: 40歲啦，er..30幾都係!

阿仔:咁即係咪你呀?

媽咪: 只笑不答....

 趣事二-- 小飛魚

話說阿仔學了游水幾個月，有少少成績啦，

有日我問: 阿仔你學游水識幾多式呀?

阿仔: 4式!

媽咪: 咁勁? 邊4式?

阿仔: 背泳、自由式、1式、蟲蟲式!

媽咪: ! 咩叫1式?蟲蟲式?

阿仔: 我好似1字咁浮浮下啦! 咁咪1式! 我又好似條蟲攣攣下，咪蟲蟲式囉!

媽咪: 阿仔唔好同人講你識四式，要謙虛d! (我驚佢比人笑!)   

趣事三---小「王」帝

阿仔開始有寫字功課，通常下午完成，晚上我回家看，有日我檢查家課:

媽咪: 阿仔個「王」字好細隻，擦了寫過好冇?

阿仔: 哦，呢個王帝好細個，咪細粒D囉!

媽咪: 咁都得?!

趣事四--天匯效應

前排新聞，常講四叔天匯跳層事件，我都有略略解釋比阿仔知點解無4字樓層，有日我和阿仔預備返家，在電梯大堂接到爸爸電話已到平台..

媽媽在電話同爸爸講: 你下到邊，等埋你!

爸爸: 第四座(匆匆掛線!)

媽媽: 阿仔，爸爸就快到(我們住第五座)，佢行到第四座!

阿仔: 呢度都無第四座!

媽媽:   ( 心想有個醒目仔，唔驚爸爸.......)