樂樂五歲生日會！

上個星期日，樂樂喺德福麥當勞舉行佢五歲嘅生日會，果日好開心呀，有好多人好畀面咁出席，除咗親戚、朋友之外，今年仲有樂樂的同學仔一齊嚟參加，數吓，計吓，果日有成 60人出席樂樂的生日會呀！.....多謝哂！

由於生日會喺 11點舉行，而且仲要喺德福，所以好多出席的親戚、朋友〔例如，爺爺、嫲嫲、姑媽、大姑婆、丈公、二姑婆、牛牛舅父、雪姨、細姑婆、肥仔舅父、琪弄姨一家，大住肚嘅琳琳姨、同傑叔叔，SASA姨同CHRIS哥哥、賦哥哥一家同埋敏華姐姐等人都要晨早山長水遠咁出嚟，參加樂樂的生日會，喺喥真係要講聲多謝。



今年由於有成 15個小朋友出席，所以特別熱鬧，加上大部份都喺樂樂的同學仔，所以佢哋都玩特別投契，有時仲以為佢哋係度上緊堂添、因為班小朋友果日成日都好乖一個一個咁排隊，大家知唔知做乜Y，就係排隊攞禮物呀！哈哈哈哈！

今次樂樂的生日會，樂爸爸同樂媽媽都好細心咁同佢安排，希望樂樂會有一個開心而又難忘嘅生日會，所以，由場地、佈置，禮物同蛋榚方面，我哋都好用心去選擇，揀樂樂最鐘意的「反斗車王」，結果不負所望，畀我哋上網搵到一間專造3D蛋榚的餅店，訂了一個3D的閃電王蛋榚，之後我哋又喺玩具反斗城買埋「反斗車王」的枱佈同佈置飾物。


講番呢個一個「閃電王」蛋榚，真係掂！掂！掂！畀我想像中好好多，靚好多，果日麥當勞姐姐攞個蛋榚出嚟嘅時候，大家都以為又係THOMAS蛋榚，結果麥當勞姐姐一打開個蛋榚盒，個個都嘩！嘩！嘩！個蛋榚好靚呀，就連坐咗喺度好耐無乜點旭的同學仔媽咪，個個都攞架相機出嚟影相，至於主角樂樂，佢就梗係偷笑啦，勁仲鐘意！〔其實樂樂都唔知我訂咗呢個蛋榚嫁，生日果朝早，我仲同佢講話，樂樂媽咪訂咗你最鐘意嘅HELLO KITTY 蛋榚畀你呀！嚇死佢，佢話唔係嘛媽咪！〕

唔覺唔覺，個半鐘的生日會話咁就過咗了，見到出席的無論大人同細路都玩得咁開心，樂媽媽同樂爸爸都感到欣慰，希望有機會再邀請大家出席樂樂的生日會丫。多謝哂各位！