2009 05 25 急性腸胃炎

5月20日夜晚,食完晚飯之後我食左一碗雪糕,結果5月21日朝早8點幾開始我肚一路抽痛,痛到醒左,果日我本身係放假,然後我個胃一直係咁抽痛,我以前都試過咁痛法,所以我知道應該係胃炎,到左9點,我開始肚瀉,全水狀.去完廁所,我繼續番上床休息,但胃痛持續,到左10點,我開始嘔吐,又係只係嘔水...我覺得好辛苦,好想call白車入急症室,但我心諗,會唔會再過一陣會好d呢?10點半,我繼續肚瀉,....我一直忍到12點左右,我換好衫落樓下睇醫生,係我到達診所既時候,好想嘔,我問姑娘攞左一個膠袋,點知又想痾,我即刻去左衝左去廁所,又係肚瀉....唉,真係未試過咁慘咁辛苦,醫生話我係急性腸胃炎,我好快番到屋企,一開門就衝入廁所再嘔....只係個朝早,我就痾左3次嘔左2次,我都好擔心我會脫水,但又唔敢食野,怕再嘔過...我即刻食左d藥就休息下..瞓到下晝3-4點,我真係好肚餓,之前一日既整左d飯,所以我就煮番熱黎食,總算平平靜靜,個胃無痛,無幾耐我又繼續瞓,瞓到都唔知幾點,覺得自己全身發滾,用探熱針一探...真係估唔到101.2度,攪乜鬼發埋燒呀 ?呢個時候我又肚痛喇..又要去廁所,當然又係大瀉啦....一路仲係繼續瞓,到左夜晚10,我起身又嘔一次...想係辛苦到想死..我全身無晒力,無食野...一路瞓到夜晚12點,我起身食左碗粥.我已經打番公司請左第二日既病假,我估我都無氣力番工.

5月22日,我一起身就肚痾,不過就好過21日,無嘔,只係想嘔,我keep住準時食藥,不過都仍然有痾.全日我都只係食粥,唔敢食其他野.

5月23日,我一起身又係肚痾,但我開始番工喇! 差唔多番到公司,我個胃又出現第一日咁樣抽痛法,我考慮緊支唔支持到今日既工作呢 ?上半晝,我只係做一d文職既工作,所以我係仲應付得到.到左下晝,個天一直落雨,我本來要做既工作就就取消左喇...真係好彩 !番到屋企我都係食粥,但依然都仲係肚痾.d藥都食晒添喇 !

5月24日,肚痾既現象仲繼續持續,我打算放工去睇醫生.番到公司個人又好生猛,不過我都仲係keep住食粥..今日又係落大雨呀!所以我既工作又取消左喇...yeah !..放左工,個人都覺得無咩事喇,所以都冇去睇醫生,番到屋企,差唔多準備食粥,呢個時候,個胃突然開始又唔舒服喇...一路痛楚加劇,我覺得係胃抽筋,因為以前都試過,我一路食晒d粥,然後係屋企搵d胃藥出黎食....過左一段時間,d藥完全都唔見效既,我覺得好痛,用左暖水袋敷住都好似冇幫助...瞓左係張床度,又好似好d...過左一陣再接摩下個胃就舒緩左胃抽筋...唉 !!我腸胃炎左咁多日,幾時先好呀 ?夜晚又開始肚痾,我唯有食喇叭牌睇下好唔好d啦...

5月25日,我一起身又係肚痾.不過個胃唔痛都唔理喇...照常番工.....番到公司,今日竟然無粥賣,咁我點算好呢 ?又唔敢食其他野,樣樣都油到死..我決定買一個麵包就算,食完個麵包,我個肚都好似無食過野咁,仲係好肚餓...同d同事一齊玩得好開心,因為落下雨,我地又唔使開工,一路到下晝2點半點,唔係喇,我真係好肚餓,腳步浮浮仲暈暈地,我即刻再去買野食,可憐既我咩都唔食得,仲要食得既包得番一個,我焗住揀果個睇落一定都係食唔飽既提子包.再買埋一個蛋糕仔,希望可以頂到肚餓啦....一路係咁就頂到放工喇.番到屋企即刻買碗粥食,食到飽一飽,好滿足呀 !!!!!!!然後就好眼瞓,一瞓就瞓到放晚十點,起身又開始肚餓, 鬼咩,d粥邊到食得飽人架,我食左5日粥喇....點解我仲未好架 ????????

講番點解我食左果日果盒雪糕會出事

事緣盒雪糕2月就買左係度,一路都未想去食佢...有一日,大廈冇電一整日,大家都知會發生咩事架啦,因為我完全未食過,我唔想丟左佢,我之後再食咩出事囉,明知故犯,呢d係咪叫抵死呢 ?而且我腸胃不嬲都差,我都仲再搏...真係都唔知慳黎做咩.辛苦既,咪又係自己囉...........講完 !