東鐵賤男

唔知點解東鐵咁多賤男，繼上次那個「R」細佬的賤男後，今日返工又俾我遇到另一個賤男!!

今朝返工時間在東鐵列車入面人人都係由上水企到出紅磡，到左大圍站，有一部份既人會落車轉乘馬鐵，有人落車，即係有位啦，咁有個女仔就慢慢咁坐在佢前面個吉位，點知遠遠傳來一把男人聲:「喂喂，唔該唔該...」，只見有個大陸feel的平頭裝男人老遠咁穿插在人群中跑過來，同岩岩先坐低個女仔講:「唔該俾我坐丫，我隻腳有事。」當時個平頭裝男人摸摸自己的右大腿「扮」隻腳有事，佢咁「主動」，個女仔當然唔同佢爭啦，講真都到左大圍啦，都唔坐得好耐。

個男人坐低後勁興奮地翻閱免費報紙，周圍D人都向佢投以不友善的目光(包括我在內)，我個人覺得佢係知道自己有問題的，因為佢成日周圍望有無人望佢!!! 到左紅磡，我要落車了，那個男人亦都企起身要落車，嘩!!! 車門一開，佢竟然以九秒九的極速衝出車門，又在人群中穿插，行得快過我呢個隻腳無事既人多多聲!!! 你話啦，佢隻腳「有事」??? 係咩事呀??? 香港腳發作呀???? 正一賤男!!!