【養第一隻狗狗的經歷】

            我細細個時係好怕狗，估唔到大後會養狗狗仲養四隻，真係多謝我太太(加菲)，佢令我愛上狗狗。

        講番我第一次養狗經歷，九八年同當時未結婚太太租住大角咀一單位。係我太太鍾意狗狗先，想話養番隻，我冇所謂，起碼我反工時佢都有個伴。十二月某日，我同加菲銅鑼灣周圍睇狗，心目中未唸住養咩狗，跟住其中一間Pet Shop認識曲架呢隻品種，當時見到有兩隻曲架仔，有隻好活潑，但我未買。隔幾日，唔知係咪好掛住隻曲架，我同太太決定買佢反。

        再去到個間Pet Shop，隻曲架已俾人買，有失望，個店主話仲有一隻係樓上，抱佢落俾我睇，剩底個隻睇落都幾得意。我太太一抱起手已唔捨得放底，隻狗狗都幾活潑，睇佢個條唔夠半吋尾係咁出力擰，令到我太太幾咁開心，就決定買個隻。我俾二千八佰蚊後個店主話未得住，要同隻狗狗扮靚靚，叫我出去行個圈先，咁我四周行兩三個鐘頭再反Pet Shop，果然隻狗狗靚仔，跟住個店主問我係咪第一次養狗，我話係( 惡夢開始料 )，個店主話養狗要準備好多，個口就同我講：「要買狗糧啦！狗籠啦！狗兜啦！水樽啦！梳啦(兩種)！沖涼液啦！護毛液！洗耳水！指甲剪！手提籃……等等！」嘩！我腦就唸：「要 $$ 啦！要 $$ 啦！要 $$ 啦！要 $$ 啦！$$$$……等等」結果…五千幾蚊落樓，唉！

        臨走時我將狗狗放入手提籃內撘地鐵，出地鐵站後隻狗狗開始係咁嘈，我又唔識聽狗話，只聽到由鼻哥發出好高音「庵」「庵」聲，佢又不停咁郁，都唔知想點？行到去屋企樓下馬路，突然咩都靜哂，只聞到飄來陣陣幽香，嘩！隻狗狗個手提籃內開大呀！

        反到屋企我要展開「番新工程」，我仲要鼓起勇氣做我畢生第一次 —敝氣清理個堆「榴蓮」。「工程」完成後，太太問我一樣，隻狗狗叫咩名好呢？，起碼以狗狗洩洩時都有個名鬧。唸唸去，都係簡單叫「仔仔」，就係咁，我同太太第一隻狗狗叫「仔仔」。

        直到我寫呢篇說話，仔仔坐我隔離望住我，個種眼神好似話我做咩要將佢細個時瘀爆出！哈哈！                                                                                          2007年1月29日    8:30pm筆