公公，希望您住得舒服

尋日同屋企人﹑亞婆﹑幾位舅父﹑舅母去探亞公, 因為亞公原有既墓地夠期, 要另覓另一個地方俾佢安息, 結果舅父幫亞公搵到一個安放遺骨既地方, 就係原本位置附近, 類似骨灰庵, 但就可以將整個先人既遺骨安放。

我唔知呢種格局既地方叫乜野名, 不過佢就寫住「佛教墳場」, 全幢樓得三層高, 每一層就好似圖書館咁, 不過當然唔係擺書, 而係先人既靈位, 感覺上好簡陋, 不過現場不斷播住d梵音, 如果唔係既話, 靜英英仲陰森。係等齊人同石佬期間, 我好好奇咁周圍睇其他先人既靈位, 大部份都係百年歸老既老人家, 有d仔女仲好有心, 將爸爸媽媽放埋一齊; 不過間中都見到有英年早逝既先人, 可能廿幾歲, 甚至十幾歲正值人生剛剛起步時就離開呢個世界, 好感觸......當中我仲見到有幾歲小朋友既靈位, 佢地既父母一定好傷心......可能因為自己唔止一次曾經接觸過死亡, 我會做一件好奇怪既事, 就係估佢地點解會過身, 個小朋友會唔會係因為患上重病? 個後生仔會唔會係因為遇上交通意外? 個亞叔會唔會係因為遇上工業意外? 當然我只係心入面估, 唔會講任何不敬既說話啦。

之後石佬黎到, 俾我地睇下亞公既遺骨, 我都係第一次見到真真正正既人骨, 係完全無經任何防腐處理既人骨。雖然係第一次見, 但當中完全無任何恐懼, 因為眼前既係曾經同我一齊生活過既亞公, 可以見番佢都係一件開心既事。之後我地上香燒衣紙, 不過原來依家d陰司紙跌晒價, 以前一張都幾十億, 依家一張最大都係一千蚊, 可能連地府都通縮......

回想起細個時, 同亞公﹑亞婆﹑舅父一齊住, 我因為亞公對亞婆唔好, 所以一直都好憎亞公......到大個懂事跟番亞爸亞媽住, 亞公身體已經越黎越差, 最後果幾年仲因為受癌症折磨而過得好辛苦......我一直以為亞婆好憎亞公, 但到亞公過身既時候, 最傷心既都係亞婆, 可能有d感情幾十年都放係心入面無表達出黎......好記得當時有位道士幫亞公計回魂日子同魂丈, 佢話亞公最唔捨得既就係呢個家, 聽到呢句說話, 幾十年既恩怨一下子已經煙消雲散......我好後悔一直都無盡過做孫既責任好好孝順亞公, 依家唯一可以做既, 就係多d去探佢, 燒多d野俾佢, 當係一種補償, 希望佢係一個無恩怨無病痛既世界生活得開開心心。