轉載文章 – 閃電結婚

早日睇人地個 blog 見到一篇好有意思嘅文章, 所以 copy 左, 唔好意思  喺度想同大家分享下!!

閃電結婚
或者我朋友圈裡面既朋友，大部份都到左適婚年齡，呢一兩年，收多左好多朋友「閃電結婚」既消息。

即係年頭先聽到朋友話岩岩識左個男仔拍拖，大家連佢個男朋友都未見過，失驚無神年中就收到佢地既紅色炸彈，話下個月拉埋天窗啦。

我有時都擔心，兩個人識得果一陣，咁就決定成世人既事，得唔得架。我見d朋友，買架車買間樓，甚至買兩手匯豐都要左諗右諗啦，結婚咁大件事，一世架喎，反而可以諗都唔駛諗，話去就去。

我睇住呢d事情發生，有時都覺得幾感觸。有d朋友以前有個好固定既男朋友/女朋友，拍左十年八載。一班朋友由細玩到大，熟晒啦。咁跟住唔知搞乜散鬼左，冇幾耐之後，朋友結識到新既伴侶，一齊行埋幾個月，就結婚啦。越黎越覺得，人生有好多事，都係講timing。你最後同佢走入教堂果個人，未必係最好條件，又或者係你最鍾意，不過，就肯定佢響你生命中出現既timing，係最準確既。

我早兩年結婚既時候，我其中一個老友岩岩散左拖冇耐，跟住又識左個新既女朋友。結婚前兩個月，老友既ex打電話俾我：「喂CK，知道Stephy同你就快結婚啦，出黎俾我請你地食餐飯丫。我知你結婚果日好為難，唔方便請我黎飲架啦，不如等我預早黎賀一賀你。」聽完佢咁講，我都不禁要嘆左口大氣。現實往往就係咁，同一個圈子裡面，今日同你好似好friend好熟既人，可以一夜之間，唔再方便同你見面，從此大家就響彼此既世界上消失。

果一次之後，我就再冇見過呢位老友既前女友勒。

我之前都以為老友會同呢個ex行入教堂，佢地行左好耐，一直感情穩定，點知因為一件小事，最終事與願違。

至於新果一位女朋友，老友同佢拍拖冇耐就結左婚啦。老友呢一位新既女友(已經係老婆啦衣家)，係一個容易相處既人。佢亦成為左我地朋友圈既「新」成員。不過我有時當成班朋友出黎既時候都會諗：我地既朋友圈裡面，咁多年黎，其實兜兜轉轉都換過好多人。每一個朋友，交一個新既男/女朋友，都意味住圈裡面會有新人加入，舊人離開。人來人往，有時，都唔係咁容易適應。

好彩老婆同我一直都響呢個圈入面，冇離開過。

週末之前，心情異常納悶，一切都提唔起勁。

祝大家有個愉快既週末。