Day 3 (31 December, 2008)

Day 3 (31 December, 2008)

白川郷 > 金沢 > 小松空港 > 羽田空港 > 新宿 > 六本木 

係民宿住過一晚，就起身食老闆娘為我地整 o既早餐。早餐雖則冇晚餐咁豐富，不過都好有風味。

食完早餐後，就執拾行李退房，我亦把握機會用我有限 o既日文同老闆娘傾計。當佢知道我 o既職業係咩時，佢大感驚訝，因為佢一路以為我係 designer 或髮型師哦類職業。呵呵呵~

呢位就係老闆娘喇~



離開民宿時，先發現原來佢地養左一隻柴犬！我咁鍾意柴犬，當然即刻行上前同佢玩啦，而佢見到有個人行近佢，都好開心，慢慢用個咀推開腳前 o既積雪，行近我 o既方向。可能佢平時真係好悶，成日坐係屋外冇人同佢玩啦~~



原來前晚落左一晚大雪，令積雪比尋日厚左好多，開心死我喇！   呢日成朝都一直飄著密密 o既雪，正是我夢寐以求 o既情境！

下面呢一間就係我地住 o既民宿。




以下白川鄉 o既童話世界~~~





















尋日個湖仲係水 o黎，今日結左冰喇。




之後我地就搭返巴士去金沢，先去買一 d 金沢 o既手信，然後就去左下面呢一間餐廳食漢堡扒做午餐。點解揀呢一間餐廳？睇下相入面有咩公仔啦~~~



食飽，就搭酒店 o既免費 shuttle bus 去小松空港，再搭飛機返東京。



返到東京後，我地先去新宿間酒店放低行李，抖一抖，再起行去六本木。已經係晚飯時間，我地去左一蘭食拉麵，食完就上左去 六本木ヒルズ大展望台，係呢一度可以好清楚睇到好靚 o既東京鐵塔。



是日係大除夕，係出發前已經做左功課，知道東京邊一 d 地方會有倒數活動，其中一個就係增上寺。我地先搭車去到東京鐵塔附近，然後行去附近 o既增上寺。大概十一黠，已經集結左好多人，到十一點半開始，已經個個企定定等倒數。

最後十秒，大家一齊由 10 倒數到 1，正式踏入 2009 年，成千上萬 o既透明氣球飄上天空，好壯觀。





再望望後面 o既東京鐵塔，由之前 o既橙色變左做藍色，再打出「2009」，正！



聽日係 1 月 1 日，會去排隊買福袋~~