2009年 叱吒十大預測

仲有唔夠一個月就係頒獎禮，等我預測下今年十大係邊十首先~~

至尊歌曲：阿波羅 - Rubber Band
第二位：相對論 - 張敬軒
第三位：七百年後 - 陳奕迅
第四位：你瞞我瞞 - 陳柏宇
第五位：原來過得很快樂 - 楊千嬅
第六位：叮叮車 - 薛凱琪
第七位：給自己的信 - 鍾舒漫
第八位：以你為榮 - 古巨基
第九位：妮歌 - 何韻詩
第十位：B.O.K. - 側田

講到金曲，今年真係搵唔到一首特別標青。既然係咁，倒不如貼首既好聽又適合 903 用來搞驚喜 o既歌。比起陳奕迅同張敬軒， Rubber Band 來得新鮮得多。加上《阿波羅》真係今年少有 o既好歌，係就係唔係一線歌手，不過機會唔係冇，我撐。至於《你瞞我瞞》，我冇諗過 903 會突然間轉性肯播佢 d 歌咁多，可能想 show 畀人睇「好歌有好報」，所以熱播？《原來過得很快樂》應該係 903 送畀千嬅 o既遲來結婚賀禮，可惜旋律只屬一般，如果唔係佢就可以一圓至尊歌之夢。《給自己的信》因為祖兒幫手而帶畀鍾舒漫第一首十大，亦因為咁，祖兒今年有好大機會斷欖冇十大歌。《妮歌》點睇都似係十大歌，加上 HOCC 今年表現不俗，冇女歌手獎下攞返首十大歌，合情合理。最後一首，除左《B.O.K.》，仲有一首《弱水三千》都好大機會，不過我個人較鍾意前者多 d。

唔爭在，預測埋男歌手、女歌手同組合~~

男金：陳奕迅
男銀：張敬軒
男銅：方大同

女金：謝安琪
女銀：容祖兒
女銅：薛凱琪

組合金：Rubber Band
組合銀：at 17
組合銅：農夫

男歌手方面，基本可以分成兩個 PK 賽：陳奕迅同張敬軒爭男金，方大同就同古巨基爭男銅。男金之戰，兩個都係環球歌手，正所謂「手掌係肉，手背又係肉」，既然係咁，不如繼續係 Eason 好 d，少 d 野講。男銅方面，由於今年方大同既冇歌曲獎，又冇唱作人獎，應該點都會畀個獎佢掛，佢話晒係上年男金得主喎。

女歌手方面係最混亂，四個女歌手：薛凱琪、謝安琪、容祖兒同何韻詩，個個都有力入三甲，未到最後一星期都唔知 903 想邊個攞金，邊個踢出三甲，夠晒刺激。不過，我個人較睇好 Kay 可以攞金，而 HOCC 就應該只得第四。

組合方面，Rubber Band 必定係金獎，係銀獎同銅獎有可能會互調。較意外係，今年人氣熱爆 o既 Mr. 竟然三甲不入。不過話唔定，我最喜愛組合係 Mr. 攞。