創意蛋撻

熊貓有日睇到電視介紹 榴槤蛋撻（呢段tvb短片要去到 23 分鐘至睇到架！），自此就念念不忘，一直都好想試吓！ 終於，今日興之所致就走咗去買嘞！

好在可以比我預早訂定，所以去到就可以買到剛剛新鮮出爐嘅蛋撻啦！嘩！ 不過人山人海咁！咩真係咁好味咩？

熊貓一直都只係鍾意食曲奇皮嘅蛋撻，而佢地呢 d 特別款式大部份都係酥皮架！不過算啦！照食囉唯有！

本來一心打算去到買我訂咗嘅榴槤撻、葡撻同雙皮奶撻嘅！ 點知比我見到好多人買佢嘅迷李凍撻喎！仲係買五送一，望望吓又好似好好味咁喎！  於是我又忍唔住買埋，其實佢仲有其它味道嘅，不過嗰 d 特別味道，睇落有 d 駭人咁！ 我唔敢試啊！最後我買咗楊支甘露、芝麻、芒果同豆腐，我估楊支甘露同芒果應該會幾好味咁！

(好好味嘅榴槤撻呀！不過只係面層 d 榴槤好味咋！係好、好、好榴槤呀！)

（我覺得鍾意食榴槤嘅朋友值得一試呀！非常濃味！）

（下面嘅雙皮奶撻，食唔到味喎！ ）

（下面嘅係葡撻！不過我覺得 KFC 嘅好味過佢好好好多倍啊！ ）

至於迷李凍撻，我已經食唔到喇！ 因為一入屋食咗三種唔同口味嘅已經有 D 想嘔喇！我將 d 迷李撻放響雪櫃聽日至試，不過曲奇皮嘅唔知會唔會好味 D 呢！

（芒果  ）

（豆腐  ）

（楊支甘露 ）

買咗咁多返屋企，其實都有 d 後悔架！因為只得我一個人食！ 平日見人地有好味嘅嘢買返屋企時，通常都係一入屋，d 屋企人見到自己一袋二袋，就會好開心同好好奇走埋來睇，然之後就一齊食一齊研究邊種味道好味！不過，呢 d 情景熊貓其實都無機會試 ，每次買返屋企，大部份食物都係自己一個人去享用，永遠佢地都唔會好喜悅咁同我去分享食物嘅！就好似我有時響超市見到有 d 好味餸菜，買返屋企加料咁！一入屋，哥哥見到時第一句說話並唔係「嘩！斬料呀！」而係會話「屋企已經有咁多嘢你仲買！點食得晒呀？！」

好多次我都覺得好沮喪同失望！ 每次都話唔會再買嘢食返屋企同大家一齊食，但久唔久都會忍唔住，好想同人家一同分享 ma！ 好似今次咁！買之前同哥哥講我訂咗幾個撻，放工要專登去攞完至返屋企，佢會話「  食咁多仲點食飯呀！」　我話「咁一齊食 ma！」返到屋企時，我話 「食咗蛋撻之後要遲 d 食飯！」，佢又會話「遲 d 食飯咁我點去游水呀！」

結果，各式各樣嘅撻，都只係得熊貓一個食！

其實人與人之間，講說話點解唔可以有技巧 d ，稍為修飾一吓至出口，去令聽嘅人覺得感覺舒服 d 呢！

整體來講，只有榴槤撻值得試吓！  其它都唔好味呀！仲有！佢個酥皮都唔好味架！佢好難食，我覺得有陣豬油味啊！ （雖然我未食過豬油，唔知豬油係咩味！但我估應該係豬油味架喇！唉呀！肥死喇今次！）我下次唔再買架喇！  我都係覺得「泰昌」嘅撻好味好多啊！