蒸魚拆蟹 (高偉強)

6月23日，早上下著大雨，到達沙頭角時雨勢減弱，安心吃早餐，艇王根通知，街市有好靚藍花蟹，又大隻，食指大動，但不能買太多，只因帶了個12L小冰箱，估計今天不會半豐收。根記幫我揀六隻打底，兩斤幾百二蚊，抵買。又有後著，「龜」了也有蟹可吃。

中午在內灣釣得幾斤立仔，此時李逵持著兩把〝宣花大板斧〞殺到，亂劈，黑旋風兼雷暴，所謂「君子不立烏雲之下」，要避避，直駛出鴨洲碰碰運氣。雨過魚開口，你一條佢一條我又兩條 (我用兩副繩)，起了一輪黃腳黑立，輪到牛鰍開口，六両至斤頭，邊釣邊想，今日又蟹又魚加埋雪，要打爆個冰箱。

4點半，黑雨又來，趁機收皮，有魚吃餌都要走，否則我個冰箱不夠裝。結帳17斤，牛鰍與立各半，冇龜冇龜！