V.O.

早前逐少逐少又輾轉咁喺唔同的人身上得知自大老細上位後，為免日後唔使俾阿嬸抽稱，刻意叫一眾老細盡量唔好搵我，知道之後真係有種喊的衝動。我喺公司咁多年，主要都係幫佢同佢條直屬馬仔獅子王做嘢，大家關係唔係close但一啲都唔差；而我雖然覺得你做老細有你不足的地方，但當其他人唔聽你枝笛時，我對你一直都有幾分尊敬，所以當我知你用盡方法斷我米路時，除咗覺得你勁仆街之外，我真係好失望、好唔開心。

今年工作量的確銳減，舊年可能有兩、三個project一齊做，最忙的時候日做夜做個樣極殘，而家都殘，不過係因為有時間日煲夜煲買落好耐的電影同電視劇。好彩近日有啲下欄嘢幫保下。夫人搵我做research，雖然個pay唔多，但都同工作量成正比，而最開心的係，當大老細同佢講我的情況時，夫人的回應係：「如果佢做到，點解唔搵得佢？」我跟咗佢兩年都無，佢就肯幫我！

另一單係錄VO。打聽過後，知道係Esther提議搵我架，而獅子王都無理會爸爸而批咗。記得好耐好耐之前，同另一部門的阿頭閒聊時，佢喺一個彼此唔係咁熟，唯有喺好客氣的情況下，以一種好似好誠懇的語氣咁話過我把聲OK，可以試下主動搭下路，向嗰面發展下。我一直覺得自己未夠好，根本唔可能以此搵食，但而家有機會做，當然會把握機會施展渾身解數。我都知道平時自己把聲好低沉，所以錄的時候都特登升咗好多度呀。一來唔想做衰人地個節目，二來都想有第二次啦
http://programme.rthk.org.hk/rthk/tv/programme.php?name=behind_medals&d=2010-01-17&p=4714&e=102488&m=episode
http://www.rthk.org.hk/elearning/sports/behind.htm

突然諗起好多年前喺網上識咗條騎呢友，佢send咗自己著住制服的相俾我(唔係咸濕相！)，然後同我講：「俾啲意見丫！」