投訴

睇新聞有時覺得香港人都幾矜貴，遇著唔啱心意的事就話要投訴，埋怨人地處理得唔好，為自己帶來不便……貴族咩？講到自己一啲適應能力都無，社會一有任何改變自己就會死咁。

好似早前地鐵同火車合併，乘客在九龍塘不用出閘，直行直過就得；為咗等乘客唔好行錯路，港鐵安排臨時員工充當鐵馬圍哂條路，又手持老lin咁大的紙牌舉足成朝。偏偏大把人在鏡頭前指手劃腳，又話混亂又話指示唔清楚，又投訴出閘機未拆走，都唔知使唔使拍咭……其實閘門己拆下，你鍾意可以繼維持拍咭的動作，反正唔會扣錢，嘈乜Q啫？

好怕呢種人地明明為了件事長遠好而造成短暫的所謂不便，大眾就群起而攻之，不容許過度期的存在。很久之前，某屋苑旁的大馬路，居民投訴噪音問題嚴重，後來運輸署回應訴求，在馬路旁興建隔音屏障，無賴的居民竟然投訴施工期間工程產生的噪音比車聲更大……

為了博取同情與關注，又有人會誇大自己的受影響程度。好似打風咁，少咗人行街，記者實會問下啲商戶有幾大影響，損失有幾多，受訪者照例會講到好大影響，生意比平時少咗四成、六成。雖然做生意的suppose數口都精，但我唔信佢咁快計到，反而這種疑是隨口捏造的數字令我對他們的同情大幅減低…hmm…大概係七成。

唔好誤會，我唔係聖人，我都會投訴，不過我覺得如果影響不是太過切身而又可以忍受的，可唔可以都加入少少體諒？問心嗰句，而家唔使過閘有無少少方便咗？啲車聲仲有無咁嘈先？唔好下下都將雞毛蒜皮的事講到雞毛鴨血咁啦。