正生

政府表明立場支持正生書院搬入梅窩，當地居民繼續示威，要求保留已封塵兩年的校舍給梅窩學生上學。講咗好多次殺校係因為收生不足，多年來亦無其他辦學團體申請接嚟做，根本唔係有心唔俾佢地用，一直以為班居民萌塞到講極都唔明，原來講到尾都係唔鍾意班吸毒仔、吸毒女。

一個三十幾歲的梅窩男人在遊行時接受訪問，話梅窩治安一向良好，問政府點擔保正生的遷入唔會增加罪案率。連一個似乎受過教育的人都有咁的諗法，都唔使奢望一班鄉親父老可開其茅塞。而家政府在一片反對聲當中落實決定，媒體同市民又一致大數梅窩居民的不是，好似成個社會都針對呢個小島咁，分分鐘慌島叛變，激起一眾暴民的偏激情緒，只會對正生學生造成更大傷害。

怪只怪居民表現過分偏激，完全顯露火爆本性，裝不出酷。相反連日來正生認真盤算怎樣走每一步，計算準確，贏盡梅窩以外的人心。正生學生乖巧地出席居民諮詢大會，希望居民對他們改觀並加以接受，誰知居民認為錯一鋪就衰一世，唔俾機會翻身，仲分別以天真小孩和年邁老人表達長途上學及照顧兒女的苦況；本來居民未輸，點知呢一刻不斷咆哮，學生終於喊咗出來，校監校長一定暗喜，最好你地鬧得勁啲，學生喊得再慘啲；陳敏兒一句「攬下佢地！」正生大概已知勝劵在握。

前日開會，正生繼續出動學生。不會懷疑學生改過的決心，面對傳媒的鏡頭就已經需要極大勇氣，只是覺得校方經過之前的意外收穫，似乎有意推學生上舞台，反正居民衝動依然，喝罵之際學生多留幾滴眼淚固然可以返尋味，即使只是捕捉到零星的無奈面孔也定必奏效。

沒有貶低正生之意，如果這的確是刻意的安排，我反為他們的聰明而更加支持。世人總會用自己的方法得到渴望的事與物，有些明刀明槍，擺明車馬，有些略施小計，伺機出擊，只要沒有傷害別人，我覺得都沒有錯。反而羨慕正生的每步棋都順從心意，就連對手都蠢過人，今時今日仍然繼續跳入陷阱；相反有人以為計劃完備，可惜感情用事，弄得滿盤落索。