美味棒

山崎出品的美味棒可以話係鎮店之寶，小學的時候已有得賣。經歷過由好多分店到撤離香港到近年回歸重新嘗試一展拳腳，仍然無變的就係呢款美味棒，到今時今日，每日出爐擺到一架都係，但仍然會有好快賣哂的現象。所以當我有日喺office拎出嚟時竟然無人識佢，我係好詫異的。

美味棒其實係中間夾有嫩滑奶油的香軟麵包，約一呎長，粗度適中，放入口剛剛好，不會發生咬左邊時右邊唧咗啲cream出嚟，搞到揩到塊面或整污糟衫的尷尬場面；獨立包裝，食唔哂放落袋都方便。價錢現為$8。以一個咁嘅的名去話俾人知佢係好嘢，大家不容錯過的做法可以話係好tacky，可能山崎真係對自己的出品好有信心，但我都曾經試過覺得佢老土而唔想買，只是敵不過已於小學時種下的感情。

小學時，阿媽會買定麵包俾我小息食，可能因為貪佢有獨立膠袋包裝夠方便，佢成日都會買美味棒。搞唔清楚係美味定係棒，總之好快受落。其實當時山崎仲有另一同樣熱賣的名牌蒜蓉包，不過味道太濃烈，食完個口一陣味，那時我未識欣賞。

我仲好記得竟然食美味棒都俾同學笑過。兩個女同學話我男仔之家唔應該食美味棒，應該食蒜蓉包！亦因為咁，我出現一種吹咩我係唔食蒜蓉包呀的行為，又間接加深我對美味棒的鍾愛。到而家，眼見身邊人直情唔知佢的存在，我係真心想推介，如果不合你口味，fine，你的選擇，只要你唔好理我食乜。

大事件及牽涉其他人的議題上我甚少堅持己見，你可以話我無主見無個性隨波逐流，但我想用番隨和。小事、私事和影響唔到人的情況下，我希望多些以自己的喜好同需要行先，而不用理會身邊人的閒言閒語，畢竟過往我做得太多。呢種思想，大概同山崎回歸香港時的諗法一樣，都只係想討個生存空間罷了。