短片

看了InD Panda國際短片節的一套作品，輯錄了6套來自不同地方與同性戀有關的短片，最長的一段為38分鐘，最短的則只有12。在短時間內交待人與事，又要清楚又要有感染力，自有其處理的難度，不管導演多用心製作，能否得到觀眾的共鳴又是另一回事，畢竟每個個體都會因為自己的性格、口味、修養、閱歷而有不同的體會和感受。

亦因為咁，我極度強烈抗拒播映短片前，主辦機構有條友行出嚟介紹套片，佢的身分應該要客觀，但佢好興奮咁詳細講到佢最鍾意第5段，覺得好好笑，臨尾有個好特別的twist，叫大家留意。彷彿在昏暗的戲院內，仍能看見他咬著下唇，好讓那個精彩的結局不會衝口而出。

終於開始。估計有部分人抱著看情慾戲的心態入場，於是難免失望，繼而唔專心，最後造成滋擾。有人竊竊私語，以為用氣講嘢就係好為人切想的表現；鄰座兩條仆街就郁嚟郁去，唔啱睇又唔走嗰下衰；最低能係後面突然傳來一把低沉而娘娘腔的聲音，如果要搵一個熟悉的聲音作參照，我會諗起江毅：「你乜能嘢人嚟架！係咪仆街呀！」

到第5段片。40幾歲的婦人，與丈夫的性生活枯燥，獨自在家看色情台，畫面盡見搞嘢的男女。可能是受到導賞員的影響，此刻旁邊大笑。丈夫外出工幹，婦人執拾行李，在衣櫃發現4仔影帶，大受打擊。笑。晚上夫婦做愛後，婦人心不在焉，在廁所呆坐。笑。婦人嘗試對質但始終沒勇氣講出口。笑。最後婦人想通了，為丈夫召來一名男妓。大笑。

唔同人有唔同體會，我明，但我接受唔到佢地的品味如此低。成套戲sad到爆，我直情睇到心up。婦人由發現丈夫愛男人而惶惑，但因愛他而寧願他開心；丈夫對自己性取向的抑壓，到最後得到妻子體諒而淚盈眼眶，邊度有笑位？定係我太守舊嚴肅拘謹欠缺幽默感？

今天打了去主瓣單位反映意見，覺得事後搞分享會無問題，事前導賞根本無必要，影響了觀眾自己對故事的領會，但咬了一下下唇，沒有指出他的低品味。回家的火車上，螢幕播放著赤蠟角嚴重車禍的新聞，女記者在現場撞到爛哂的的士前面做扒，但微笑著。同台之前都有個男記者都喺報道自殺新聞時微笑，其實真係有人啱啱死咗，可唔可以靚少陣？

點解咁多人會不顧身分不理後果在唔應該或無必要的情況下投放感情？若然情感泛濫，又可不可以因應場合而懂得收放？即時用對了，又會略嫌落重咗手，騷擾別人，同時露底。其實大家應該向前輩李太方太討點心得，一切為生活情與趣而添加的調味料，「少許」永遠都是最適當、最無死的份量，多了只會令人吃不消，落少啲幾時都健康啲、易入口啲。希望餘下的，我會嚐到材料原來的鮮味。