穿耳

有人希望三十歲前喺尊貴地段買層樓，無敵景觀加豪華裝修，仲要養番啲貓狗；有人想三十歲前買架名貴車，得閒四圍去，塞車也是情趣；有人計劃三十歲前結婚，仲要生仔生女，出親街都一大隊。我，一如以往，唔係講緊有咩大計劃大理想，只是想耳仔穿番個窿......

想穿已經好多年，遲遲唔做，怕痛當然係好大原因，不過，最大的絆腳石其實是阿爸。佢實在係太保守，好多嘢都接受唔到，我根本已經見到佢望住我著耳仔，然後黑埋口面唔出聲的樣。無辦法，去到咁嘅年頭，我唔想穿耳都因為父母而唔敢做，而且而家唔穿，又唔想再老啲至穿，俾人話發姣。

為了乾淨衛生，本來一心喺朗豪坊穿，信唔過商場的鋪頭仔，但店員話我耳珠太厚，要揀長針，但長針的款就得幾款，無款靚之餘仲要$400。Sally同蕉皮話其實佢地從來都只是喺鋪頭仔穿，完全無問題，於是膽粗粗去咗兆萬二樓。

相信大家都唔想俾太醜怪的人摸自己，呢度看檔的一男一女就幾好樣，梗有一個照顧到你口味。女仔好nice，唔會見我多嘢問而串，反而友善解答，雖然事後朋友話佢唔啱；過程朋友影相，女仔仲叫我做V字手勢。而原來無痛穿耳唔係奸商招生意的技倆，其實一巴打落塊面真係仲痛過佢一槍打穿我隻耳！而且，只是$28！

晚上在鏡前嘗試擺出唔同表情，試下可唔可以扮型開闢新市場，結果一樣lau打。今日大熱天時，我走去飲咗一杯熱辣辣的Cappuccino，突然令我記起佢可以有幾好味、有幾咁提神，飲完之後一身汗，回味之時忘形到抹汗時唔記得咗耳仔多咗個朋友，用了一貫的力度高速由額頭沿耳仔一路抹到落下巴......超‧級‧痛！最恐怖係有一滴血水滲出！

我會小心處理，希望耳仔唔會發炎，唔好同隻耳環痴埋一齊，落消毒藥水唔會乸住乸住......最重要都係新形象受落啦！多謝Sally、蕉皮同Eva！