俾人搵笨

上年年尾，公司登哂報紙請幾個新人，職位同我一樣，但人工高啲，仲有埋我地一眾生不逢時的合約員工夢寐以求的約滿酬金。廣告一出，現職同事當然不滿，九成同事都有報考，就算老細唔請番我地，呢個都係表達不滿的一個方法，佢理唔理又係另一回事。

我做咗四年，唔係公務員的我曾經因為公務員減薪而被迫跟住減，兩次加埋減咗差唔多一成。減薪潮過咗，但減咗我的就一直都冇得加番，反而新入職的同事得到一個唔使減的正價！後來老細俾機會我做PD，但維持住PA的title同人工。愈做就覺得愈俾人搵笨，做咗PD工作量大咗input多咗，老細對你的期望不斷提高，壓力自然愈嚟愈大。我間唔中都會因為待遇唔公平而唔開心，但有啲嘢唔到自己控制，諗得多都冇用，只好嘗試等時間沖淡一切。

後來，獅子王幫我爭取加人工，個增幅聽落好似好大，但唔好忘記我少過正價一成，佢先將我個人工調番去正價，然後再加多啲，實際上只係多其他同事多少少，而所講的同事係PA，我係做緊PD工作。我咁講絕對無意眨低PA，PA的工作亦都涉及好多繁瑣細節，一樣有壓力，但PD要為節目的內容負責，我覺得責任點都大啲。

既然獅子王加過但都唔係好多，唯有自己試下爭取。所以呢個面試我都叫做準備過下，練下英文又練下普通話，特登去公司網頁睇熟個架構，又搵番啲相關的新聞睇下。面試時候表現唔覺好好，但如我所講，唔得咪唔得，起碼我而家話你我寧願做番PA都唔恨你個PD工作，而如果我得唔到呢個位，即係我連PA都不如，你更加唔好再塞啲PD嘢俾我做。

當身邊的同事陸續收到公司信，通知面試唔成功，加上收到風話請嗰幾個都係出面人，雖然我收唔到封信，但已經打定輸數。點知當我年頭要做appraisal，剛剛寫完個report，花咗唔少篇幅要求加人工之際，人事部通知我見PA嗰份工得咗，我唔使等而家份contract完，就可以即時轉新約攞新人工仲會有gratuity。我知道原本份約就算續都應該無人工加，加都唔會有gratuity咁多，我搞咁多嘢都係想攞個公平啫，公平者，就係我比其他同事年資多，又做緊PD嘢，應該要有合理的薪酬。既然你加唔到人工，我就當呢個gratuity係加俾我的，其他同事無，咁我已經覺得公平咗。

點知今日，所有同事都收到信，話下個月開始全民享有gratuity，加埋佢地轉約嗰陣人工將會加到我個level，咁你話一下子係咪又打回原形？記得月頭剛剛轉新約之後的TOL，我開廠遲到咗一個鐘，但嗰集唔係我，影響唔大。不過老細特登捉我埋一邊，攞份約大我，話背後幫我搞咗咁多嘢令我可以得到呢份約，叫我做好自己等佢對其他人都有個交待。我當時都有輕輕慚愧，但今日諗番起，我覺得又嬲又好笑，做哂戲要我臣服於你，原來你都係一個奸人。

呢頭我喺report度明確要求加人工，嗰頭你話用新約請我，仲掛咗舊約滿酬金喺個魚勾度。到我上釣相信老細開始體恤民情，聆聽黎民訴求，你今日又大派禮物，仲要係一眾同事一如以往成日都唔check個out tray，我走去屎忽痕將封信派到去咁多個同事手中！唔夠諷刺咩？我今日同時收到人事部的信，confirm我已經正式履行緊新約！

如果喺呢件咁慘的事上面我都叫做有賺的，我諗會係我鄭重意識到學識做一個壞人的重要性。好人只會俾人蝦，俾人利用，俾人迫埋牆角，仲要睇一啲根本自己都唔鍾意的人的面色。我做呢個角色做咗太耐，我要做一個壞人，因為咁我先有機會生存落去。件事未完架，我會繼續為自己爭取我覺得應得的嘢。

你咪睇我句句有火，我係嬲呀，但其實我想喊架……

(發表日期：2007年3月27日)