好命

近幾年，開始聽到一些無充分例證支持而且不合時宜的論點：「同你咁大，好命嘅都已經結咗婚，仔都有個喇！」但學阿姐話齋：「單身，也是個身分！」並不是享受現狀，但老實說，結婚生仔真係唔等如有條好命。

直至前幾年都仲希望可以同自己喜歡的人在教堂正正式式行個禮，叫做留俾自己一個特別的回憶。後來去囍宴多咗，發覺令人感動的唔係主持話要錫在場人士隨即起哄而一對新人就要錫呢一種倒模同例牌的環節，亦唔係要新人講鍾意對方的十大理由但新郎講唔出然後台下的人會覺得：「你睇佢幾緊張幾cute！」呢啲遊戲位，而是睇見一對新人在人群中突然一秒的對望、爆紙砲過後為對方撥去面上髮上的紙碎、出入上落之際往手臂輕輕一扶...這才是二人在相處中找到的默契，令自己心甘情願將對方容入自己生命中的一種動力。

朋友結婚一年，二人之間不幸地出現了問題，拖拖拉拉又一年，仍然未有結果，雙方都苦。他們沒有丟掉那張婚書，遺失了的，是那份默契、那股動力。

別人的經驗，加上自己的經歷，可以說，我對婚姻制度已經沒有期望，因此亦不會參與。找到喜歡的，感覺對勁的，很自然就會走在一起，有點信心的話同居是開心的，悲觀也現實一點去看，如果日日夜夜的相處最後令自己發現對方不是可以一生一世的人，分開，也來得容易。治療傷了的心本已不易，額外的手續只會徒添煩惱。鋪張那一刻是開心的，但分開後這一刻就會是其中一道疤痕了。

晚飯時候，阿媽望住火鍋中時浮時沉的牛丸試水溫：「呀，啲人成日話你實有拍拖，係唔話我知架啫，我話冇呀呢，佢地又唔信！」我兜頭一盤凍水淋熄咗個爐：「無呀！」再試：「你表姐話問過佢醫院啲護士，話介紹你俾佢地，有人有興趣喎...」口講：「唔好搞咁多嘢！」心諗：「有無第二啲職位？」

即係唔係話唔想拍，愛在何方，我笑我始終稀罕。事實上我都有做過一啲嘗試，亦試過改變某些曾經認為不能變的要求，不過可能係自己可能係對方，總之唔work就係唔work。好多人話我要求高，但，如果預計到唔會長久，點解要開始？我都知默契係需要時間去建立，動力亦靠相處而累積，唔放多些心機培養就唔會有結果，OK，我係矛盾咗，咁乜都識得自己解通哂就學你話齋而家好好命啦...

其實呢，介紹真係歡迎架，不過唔好唔同我溝通過就行動，可唔可以做少少資料搜集？