早晨

搞了差不多都有一個月，終於在最後兩天集中火力踩到盡，本corporate brochure在琴日凌晨五點幾正式sign-off。過程俾阿姐鏟過好幾次，無論是搵資料、寫嘢、搵相各方面佢都有不同程度的不滿意，俾人鬧嗰刻一定會唔鍾意，鬧完諗番就唔開心的多，只希望每一次踩屎之後，起碼會學識改，唔會再衰同一樣嘢。

氣餒也不完全因為自己。做一本書去介紹公司，我絕對贊成要做到十全十美，不過阿姐真係五時花六時變。同一段文字雕琢十幾廿次，一張相話要又唔要再要都係唔要最後又要番；好喇，呢啲所有嘢都改好喇，佢又覺得一張明明佢一直都話好靚的相突然唔再鍾意，有啲我地事實上提議過而被佢否決的版面突然俾佢「發明」咗，個design出咗20個版本都係藍色字佢突然話要轉綠色，但下一個版本又要改番做藍色……嘩！點頂呀？

我都幾羨慕佢的文筆，亦有時認同佢的taste，但對於呢種做嘢方法就真係不敢苟同，追求完美的過程無planning或無諗過要plan但卻要其他人配合自己，我地都話硬著頭皮要照做，個designer唔係in house，無理由要成晚stand-by幫你通頂。唔顧別人感受真係十大罪行之一。

但，一切怨氣在佢叫我今日可以放補假時又暫時散咗一散。六點先走，上車時天已微亮。本打算在車上好好睡一覺，但歌與歌之間的三秒寧靜位俾我聽到司機同啲同行講：「好快啫，我而家入隧道(獅子山)，三個字可以入到嚟(粉嶺)！」我即刻表明立場：「唔好呀下！」之後唔敢瞓，等佢知道我一直監視住佢。