Pussycat Dolls

時：2007年12月31日晚上10時正，等到10時40分才開始，一齊倒數到2008年。

地：澳門威尼斯人綜合館。超過十年無去過澳門，覺得來回船票成幾百蚊好貴，又唔係有咩特別嘢睇同玩，但今次Pussycat Dolls開演唱會，雖然知道應該係個小型show，但已經有足夠理由過大海。

人：演出的是來自美國的Pussycat Dolls，六人跳舞女子組合，兩年前推出首張大碟，一曲Don't Cha唱到而家。

門票：開售價是$1,000同$600，本打算買$600，後來發現舊年拍《龍耀浦江》時認識的澳門朋友Ringo有機會攞到免費飛！因估計機會甚大，於是我唔買住，等佢消息。後來打定輸數無得去，加上突然因為節日關係唔想一個人過，決定黯然取消計劃。直至演唱會當日下午3時，Ringo通知有免費飛，於是收工即刻出發！

得飛過程：本身搵飛已經鋒迴路轉，連攞到在手的過程都好似玩Amazing Race咁。由放工即仆到去港澳碼頭，落船跑去過關，出閘去搵shuttle bus，在威尼斯人仲要周圍問路先搵到攞飛counter，counter個姐姐竟然成疊飛在手，問我想要幾多張，原來賣唔去到任攞的地步！值得一提的是當我周圍走而進入賭場範圍時，護衛旋即上前攔截，問我成年未，多謝哂！

會場：綜合館跟亞洲博覽館相似，不過多一層，聲稱可容納一萬五千人，而我數過，應該得…舞台在長方型場館的尾端。我得到的是$1000座位，於舞台左會場中段較高部分，側側地但唔算太遠。

演唱歌曲：Button, Beep, I Don't Need A Man, Fever, Feelin' Good (Nicole's solo), Stickwitu, Baby Love (Nicole's solo), Tainted Love, Hot Stuff, Bite The Dust, Show Me What You Got (Interlude), (Audiences' dancing performance), Wait A Minute, Sway, (Unknown), Don't Cha

主角表現：最想睇就係佢地跳舞，動作好快好密好準，個身好軟，乜嘢動作都做到，好正。Nicole同Carmit跳得咁勁其實都冇乜喘氣，Melody就過咗火位，成日嗌爆咪咁款；Jessica、Ashley同Kimberly都係間唔中叫 一兩 聲，但嗰啲反而似播帶。Nicole solo嗰part好難聽，成日都老牛咁，好想快啲完。

稍為不滿的是佢地成日拖時間，明知佢地係想同觀眾倒數到2008，但rundown又唔想搞咁多嘢(講真，得一隻碟的歌都唔拖得耐)，於是十點九先開場，中間又叫觀眾上去玩，又Hello Macau咗九十幾次，到最後嗰十幾分鐘差唔多每一分鐘都報一次時，好似Project Runway個Tim Gunn咁，六個女人周圍望唔知做咩好。其實寧願個show短而緊湊，好過睇到咁多呢啲拖時間的小動作。

服裝：都係嗰啲好低胸好少布但啲動作唔係烏低身就又mau又趴，又或者兩腳一係踢高，一係擘大啦。

同伴：一如以往用盡方法呼籲，不過無人想看，朋友之中唯一喜歡Pussycat Dolls的焚尼又聲稱要開工。本身打算一個人去，覺得與其跟一些對Pussycat Dolls沒有太大興趣的人去，寧願在演唱會上認識坐在旁邊同樣喜歡她們的人玩。其實最後同行的阿K都不是fan，不過到了會場，好快就認識旁邊四人，閒聊幾句已經一齊玩。

觀眾：都幾熱情，四個新朋友一早就起身跳，唱Stickwitu時，幾個踏住膊頭左搖右搖又踏埋我，倒數踏入2008年時仲攬住咁Happy New Year，朋友都話我似係同佢地去多過同佢去。

紀念品：一入場就問工作人員有無紀念品賣，佢話有，指我去老遠的一個counter，去到，明明係賣熱狗的……

意外收穫：生平第一次入賭場，只識買大細或單雙數，一百蚊一注好驚但又想玩，偏偏好似拍戲咁旺到有人會等我落注然後跟我買，而我又留意到有條友成千幾二千蚊咁買但又鋪鋪輸，於是我鋪鋪買佢唔買嗰樣，多次以一百蚊拖垮佢一千蚊賭注，勁驚俾人打。埋單贏千三！

鳴謝：澳門Hot Stuff – Ringo