Show Mi again

自從睇完第一晚Show Mi之後，一直遺憾冇買$480，因為個show真係好好睇，即使最震撼我的歌舞不佔整個演唱會的一半，但都足以值回票價，就算冇得坐地面，有得睇多次都好滿足，可惜門票一早售清，有錢都冇用。但係，給我的，無論過去我怎失手都會擁有。5月24日，網友的朋友個同事甩底，多了一張$200飛，我連網友都只見過兩次面，呢個朋友更加未見過，但我膽粗粗，一個人同一男二女走咗去睇Show Mi鄭秀文2007演唱會第七場，今場Sammi歌酬仲悉數作善事之用。

同行的人都應該細我四、五年，即大約18、19歲，全程冇乜嘢講，仲好，我可以好專心好投入咁睇多次成個show，享受每一分鐘。終於我今晚癲咗，中後段時間打後基本上全企，博哂命咁在有限空間跳舞，第二段medley真係搞到我出哂汗兼唱爆喉，即使件tee在身軀扭動間愈扯愈高，肥腰在人前若隱若現，我都懶得拉好件衫，是之為忘我！可能冇乜人識唱Mi，我附近竟然全部坐，得我一個企，我想像到我後面的觀眾見到我應該好似睇緊James Bond片頭的女郎剪影咁，兩個字：誘惑！

幾百蚊入場其實只為了睇Sammi，但係演唱會有兩part指定動作牽涉外人，一係嘉賓，二係現場觀眾。一直唔care嘉賓會係咩人，但如果你係都要我睇的話，我都想睇一啲自己鍾意的，之前嗰啲衛詩真係令人好擔心，感覺上個嘉賓唔好會係成個演唱會的污點。好彩，今晚得到何韻詩，仲要唱會歌，賺咗。

至於觀眾方面，豪邁夜總會feel師奶真係笑爆咀，Sammi都俾佢搞到跪哂地；師奶唱歌走音，Sammi狂嘲笑，師奶追住打。仲有一個麥記豬丙，一上台Sammi就話：「嘩，你要洗下牙喇喎！」問佢咩名佢諗咗兩秒都冇出聲，Sammi冇咁好氣：「唉！起歌啦！你唔使唱喇，你企喺嗰度得架喇！」呢啲真係錦上添花！

演唱會之後，喺紅館門外買相！呢樣嘢真係好多年冇做！$40一set，買兩set送一隻cd-rom，裏面有近500張相，好抵！至於呢幾日的舊碟搜尋行動依舊，全因前幾年崇洋冇聽Sammi，有四、五隻碟而家想買番，但市面竟然連影都冇！大型連鎖店冇，旺角蚊型嗰啲就算有都一嚟唔齊，二嚟索價二百幾至四百不等。我未買，仲諗緊，不過都係嗰句，無論過去我怎失手都會擁有。

是晚Rundown：

Ø           唯獨你是不可取替、放不低、愛情萬歲

Ø           Medley：X派對、男士今天你很好、表演時間、一夜成名

Ø           抱擁這分鐘、唉聲歎氣、愛是… (ft. MC仁)

Ø           薩拉熱窩的羅蜜歐與茱麗葉、交換溫柔、I Will Follow Him

Ø           Acapella Medley：I Will Follow Him、感情線上、愛的輓歌、捨不得你

Ø           默契、如果你有事、赤子、紅綠燈

Ø           我們的主題曲 (ft.何韻詩)、光明會 (何韻詩)

Ø           Medley：星秀傳說、獨家試唱、非男非女、發熱發亮、小心女人、螢光粉紅、神奇女俠、煞科

Ø           Mi、Chotto等等、叮噹

Ø           握手歌：親密關係、感情線上

Ø           觀眾合唱時間：終身美麗 (ft.豪邁師奶)、頸巾會員獨舞、不拖不欠 (ft.麥記豬丙)

Ø           回來我身邊

Ø           終身美麗

(發表日期：2007年5月26日)