11. Samuel Hui

係歌唱比賽中，我可以用＜型、英、帥、靚、正＞黎形容佢，內外條件都好有潛質。每次見到佢，大家都總會記得佢有一首代表作＜愛是懷疑＞，夠竟點解呢？

HKSC：不如介紹一下自己先啦～

SAMUEL：我叫SAMUEL啦，熟的朋友叫我做「阿苗」。

HKSC：你鍾意唱歌程度係點架呢？幾時鍾意唱歌？

SAMUEL：我鍾意唱歌程度又未去到瘋狂嘅。本身我係做工程個行，對我唱歌方面黎講時間方面都冇乜阻礙。鍾意唱歌應該係我六七歲時候，小學個時開始，我本身又有學琴，響學校又有玩合唱團，所以對音樂比較敏感D。小學六年班果年學校搞歌唱比賽，就開始唱歌喇！

HKSC：咁幾時開始參加更多歌唱比賽呢？

SAMUEL：應該係我大學時代2001年開始，當時有唔同學系搞歌唱比賽，加上我有兩位活躍係歌唱比賽界嘅同班同學。其中有一位同學唱歌唱得幾好，之後佢係出面認識左一位歌唱老師，佢聽左我地唱歌之後覺得我地都唔錯，咁我地就開始跟佢學唱歌啦，但係都係學左半年到，之後就自己學習啦！果時好多唱歌老師都會好鼓勵佢地嘅學生出去參加歌唱比賽，吸收多D唱歌經驗，所以果時就開始玩喇！當然初頭 一兩 年都只會響初賽到亮下相（哈哈！）。其實都好難入到決賽架，因為每個比賽參加者都有成一百幾十人，如果入到頭二三十個都好勁架嘛！之後就慢慢複賽又入下，入下入下先有機會入到決賽。

HKSC：咁由你2001年開始到而家係咪每年都有玩歌唱比賽呢？

SAMUEL：暫時黎講都應該係，但係我記得2004年果年都冇乜點玩過。

HKSC：點解呢？

SAMUEL：因為係2003年時都羸左一D大賽，當其時有一D老師、producer同埋D朋友都話贏又贏過啦，會唔會係時候做下其他野呢？好似有幾位朋友話，不如我地做D歌出黎，創作一下啦！咁就響果一年停左玩比賽，試下創作囉。

HKSC：咁會唔會曾經有D唱片公司向你埋手話簽你呢？

SAMUEL：想簽就冇！不過就好多試音合約（哈哈！）近呢十年都有好多唔係歌手合約，反而係試音合約就有好多，但就唔係個個都真係有得試，都係一個gimmick黎架啫。

HKSC：你有冇一D難忘表演或者比賽經驗呢？會唔會係2005年呢？

SAMUEL：其實2005年都算係難忘架，因為陳奕迅嘅＜愛是懷疑＞呢首參賽歌都帶比我好多獎項。同埋講起＜愛是懷疑＞，好多唔係咁熟嘅歌唱老師見到我第一句就會指住我，叫我＜愛是懷疑＞SAMUEL。即係好多人都知道我係唱＜愛是懷疑＞啦！其實係一件好事黎架！因為係早幾年，好多參加歌唱比賽嘅人都會有一首飲歌，即係果首歌代表佢嘅，唱得特別好同埋得到最多獎！但係唱呢首歌好得意架喎，當初我唱呢首歌，有人話：「SAMUEL，你轉歌路喎！」。因為之前我都係唱D比較斯文嘅歌（例如：古巨基，李克勤），陳奕迅呢首歌唔係咁啱我唱。但係我自己覺得又唔係嘅，如果我要練嘅話，冇話唔得嘅，最後我又唱又跳，咁首歌就跑出左喇。

HKSC：咁唱左咁多年歌會唔會有粉絲呢？

SAMUEL：又唔係粉絲嘅，多數都係朋友。果時係商場駐場都會有一D fans會話我唱歌好好聽咁囉。

HKSC：咁係咪通常女fans先？哈哈！

SAMUEL：咁又唔會喎，多數女仔都會比較怕醜。由於近期多左商場搞免費娛樂，多左機會表演，所以男女fans都有。

HKSC：咁係唱歌方面仲有咩想做架呢？

SAMUEL： 其實近幾個月都有諗過，好想係大會堂搞一個SHOW，全部都係歌唱比賽中獲獎嘅朋友，大家響唱歌都有一定實力嘅，希望大家可以唱出自己嘅冠軍歌，呢個係一個起步啦！如果搞得好，就會再搞其他野！

HKSC：你覺得唱歌帶比你最大得著係咩呢？

SAMUEL：唱歌可以帶比到自己一個肯定，比人地獲得一個認同感。我本身係一個活躍嘅人，會有好多方面去玩去試，但係唱歌就比到更多肯定我去放更多心機去做好Ｄ。同埋做自己興趣之餘，有時仲可以有機會出SHOW（演出），亦可以有D外快咁，都幾開心架！

HKSC：有外快都幾好喎！咁希望你黎緊繼續努力！再唱好Ｄ啦！