特別報導 - 大孖病了

我好幾日唔得閒上blog, 大家之前既留言我都睇左, 多謝各位對孖B既讚賞, 不過由於太攰, 恕我未能一一回覆....我其實仲有好多篇blog未出, 不過要先黎個特別報導, 講下呢幾日孖B既情況先...


呢日我朝早照常返工, 臨出門口時, 孖B都已經醒左, 我地仲一齊玩左一陣我先出門口, 當時佢地都無咩異樣, 仲玩得好開心添~

點知到12點幾個陣, 我99突然來電, 話我知大孖好似發燒, 同佢探熱時有38.6度, 於是比左之前係健康院拎番黎既退燒藥佢食, 並且即刻帶左佢落樓下睇醫生...細孖留係屋企, 由姐姐幫手睇住先

去到診所, 大孖已經燒到39.2度, 醫生話依家非常時期, 加上大孖又細個, 所以都係建議我地去醫院睇....於是我拿拿聲番公司請下晝假, 約左99係葵芳等, 之後一齊坐的士去瑪嘉烈醫院睇急症~

去到因為有醫生轉介信, 所以唔洗點等, 好快有得睇, 係分流站到問下基本野, 探埋熱就可以去見醫生....當時大孖除左全身滾燙之外, 並不大礙, 我不停咁逗佢笑, 佢都好有反應, 咁我都安心D.....醫生同佢檢查後, 話大孖發燒未退, 加上有兩聲咳, 安全起見都係留院觀察一晚好D....雖然我唔多想, 不過今次係BB第一次發燒, 都唔知佢做乜會咁, 怕病情有咩轉變時自己唔識得應付, 所以都係留院穏陣D, 至少有咩事時都可以即時有醫生睇....於是同大孖去照埋X光, 就係大堂等入院...

由於之前急於同大孖求診, 所以咩都無帶出黎, 所以係等入院時, 99就番左屋企幫手執拾BB既物品, 而我就同大孖一齊係度等....等左一陣, 老公趕到黎, 不過由於要等醫生睇埋X光結果先, 我地等左成個幾鐘, 先可以安排上病房~

我諗因為依家H1N1肆虐, 所以發燒既BB都一樣要入住隔離病房, 不過見大孖精神唔錯, 而且仲細, 所以暫時都係當一般流感個案觀察住先, 安頓好之後, 老公都要番工啦, 我同大孖就一齊留院~

隔離病房一間房只有兩張床位, 而且有獨立厠所, 環境都唔錯, 我地入去時, 間房仲只有大孖一個病人添, 咁我都無咁擔心, 一黎唔會有好多病人好嘈咁, 二黎我都怕其他BB既病菌會傳染大孖嘛~不過因為係隔離病房所以每日只可以有兩個探訪者, 而且唔準換人, 入到去仲要穿保護衣同戴口罩

到六點幾時, 姑娘黎探熱個陣, 大孖體溫已經跌番去38度, 所以唔洗食退燒藥, 點知到8點幾, 抱起大孖時覺得佢全身滾燙, 於是我CALL姑娘入黎再度, 原來已經燒到39.2度啦, 所以又要食退燒藥...唯一無咁驚既係, 係醫院入面大孖既胃口依然唔錯, 都仲食到6-7安奶, 只係有D扭計~

可能醫院環境陌生, 眼見大孖其實好眼瞓, 但係呢就瞓得唔多好, 只有我抱住佢時先會瞓得'冧', 一放上床就會醒, 扭計, 依依呀呀, 點都瞓唔冧, 咁我唯有抱住佢瞓啦....好在病房有電視咋, 唔係真係悶死我呢...大孖斷斷續續瞓到半夜兩點, 中間體溫都有回落下, 不過兩點個陣又突然高燒到39.6度, 姑娘除左比退燒藥佢食, 就教我用溫水濕毛巾同佢抺身散熱...一直到差唔多三點, 大孖終於無咁熱, 又開始瞓得冧D, 可以放上床一陣啦, 咁我都叫做有得抖下, 唔洗係咁抱住佢~


好在到第二朝, 大孖開始慢慢退燒, 醫生黎檢查過, 見佢無咩事, 玩得食得瞓得, 所以就話佢可以出院啦~醫生除左開退燒同傷風咳藥, 見大孖面上有濕疹, 仲主動話比埋藥膏同潤膚膏比佢帶番屋企呀~當時老公已經黎左接我更, 因為佢呢日放假呢!



唯一有樣野我好唔開心就係, 等出院其間, 有姑娘入黎話要同大孖抽鼻液, 我同老公唔知咩事, 但諗住可能係醫生安排, 所以咪照比佢地抽law, 點知大孖根本無乜鼻液, 佢地都係咁抽, 抽到佢個鼻損左呀, 我仲見抽出黎既鼻液中有血添, 心痛死我啦, 抱住係咁喊既大孖, 我d眼淚終於都忍唔住流出黎, 最嬲既係原來佢地搞錯左呀, 要抽鼻液既其實係同房另一張床係前一晚8-9點入住既兩歲大男仔, 佢媽咪話想同佢check有無H1N1, 因為有H1N1既病人都會有鼻液, 所以做化驗都係要抽鼻液~~有無搞錯呀, 都唔搞清楚就亂咁黎, 真係激死, 累到大孖無啦啦整損個鼻, 唯一係知道大孖應該唔係有H1N1, 最多係普通流感啦....見大孖已經無咩事, 我下畫就番工, 由老公負責帶大孖番屋企啦..


星期六, 大孖完全退晒燒, 亦無再燒啦, 只係食左D傷風藥, 同埋因為之前係醫院瞓得唔好, 所以仲係好眼瞓, 不過見佢係屋企瞓得咁冧都安心D....


因為大細孖一直都係分房瞓, 所以番到屋企, 唯一要做既隔離措施就係大孖係房跟我地瞓, 日頭瞓時, 就一個係high chair, 一個係地墊, 唔比佢地一齊玩住啦, 好在細孖都無受感染咋...

到夜晚, 大孖瞓左一日精神晒, 同佢玩仲笑得好開心添