覆診

星期一, 返政府覆診, 今次血糖值好好, 但就有少少尿糖情況, 但唔嚴重, 姑娘話我隱性糖尿, 係正常喎~~ 然後因為無乜人睇, 所以好快就見醫生, 聽完個B心跳, 再睇埋我自己做嘅飲食日誌就走得, 返到公司都未夠四點, 全個過程都只係用咗兩個鐘!! 不過下次覆診係14號, 已經開始要隔星期覆診嘞!!

沉日, 去私家醫生覆, 今次照3D, 個清楚啲咁見到個B嘅樣, 醫生今次又好早返到診所, 然後等咗陣就入得去, 講完近排嘅情況, 跟住就照!! 第一次照時個B好唔合作, 用個背脊對住我哋, 醫生點推我個肚佢都唔肯轉身, 結果醫生叫我出去等陣, 等佢轉吓身先再照過!! 隔咗大半個鐘再入過去, 今次總算轉咗半個人出嚟, 只做睇到吓個樣, 但係就成日用隻手擋住額頭或者個咀, 好困難先見到全個樣!! 佢個鼻仔好大個, 大家都覺得似老公, 咁都好過做扁鼻妹吖~~ 醫生話個B頭仔已經轉咗向下, 但我就諗: 咁快轉咗向下, 佢都會轉返向上架, 個肚裏還應該仲夠位架, 但我問過吓網上其他準媽媽, 佢哋話再大啲肚裏面就唔會夠位俾佢轉, 依家我個B轉咗, 應該都唔會再轉返上去喎~~

見到3D影像, 見到個B隻右眼有塊黑陰影, 問醫生係咪佢啲膚色有問題, 唉~~ 俾醫生串嘞~~ 佢話呢個只係影像, 啲顏只係加落去等你睇得清楚啲, 塊黑陰影係佢前面應該有嘢擋住咗先會暗咗, 即係你依家見到佢膚色係金色, 佢出世時啲皮膚唔會金色囉~~

同醫生講, 我尾龍骨同恥骨都有啲酸痛, 佢話係正常嘅, 尤其依家個B個頭已經向咗下, 會壓住神經線, 所以就會有咁嘅情況!