災難的 2008

今日係我同湯生結婚 6 週年既大日子

好, 就趁今日黎『回顧  08‧展望 09』...

總結 2008, 唔算係差既一年, 但係呢年, 尤其下半年, 一 d 都唔易過... 

要數 2008年最難忘既日子, 我可以好肯定講, 係 5月19日!! 呢日, 並唔係發生左乜野世界大事, 但係呢日, 對我黎講, 係一個   Dark Era  既開始… 就响呢一日, 公司黎左一個好可怕既人 ─ 一個肯定係我所遇過 最蠢最頓 既人, 而偏偏呢個人係 under 我既… 講真响呢間公司做左五年幾, 一直都開開心心, 但係天呀, 點解你忽然間要咁樣考驗我吖?? 我玩唔起架, 放過我好嘛??

唉, 既然我改變唔到現狀, 都唔到我諗咁多喇, 算吧... Review 下對 08年既展望先~

• 黎緊就做左人地老婆 5 年, 希望同湯生 keep 住恩恩愛愛, 開開心心 ←都 quite OK 啦, hehe
• 重頭再讀過日文 ← 失敗 again
• 勤做運動... 我想身體好 d, 少 d 病痛, 最重要係我唔可以比自己變成肥師奶呀 ← 肥就唔係肥左好多 可接受既… 不過 08年健康就真係麻麻喇, 大病痛又唔算, 但係感冒親都成個禮拜先斷尾囉…
• 陪湯生去澳門睇賽車 ← 尚未成事… 有拖無欠啦, 湯生
• 工作方面, 只求每日平穏過渡, 輕輕鬆鬆到 target! 至於升職加薪, 反正公司一向都唔算刻薄, 所以都無乜特別期望, if 有得 加 A.L. 就真係無得彈, 呵呵~ ← 年頭都仲好唔錯… 點知下半年遇到個瘟神, 再加埋年尾既金融海潚, 今年工作方面真係唔係幾順囉... 唉...
• 多 d 渣架車四圍去, 郊遊影下相, 食下野 ← 呢樣算達標, 耐唔耐都有周圍去下, 不過可以再多 d 郊遊… 今年繼續努力!!
• 搵到個好醫生, 等我可以安心剝埋另外果隻智慧齒 ← 仲未有牙醫比到呢個信心我喎… 點好??

好, 再黎係 2009年既目標:

個人方面:

• 我要身體好 ─ 我會乖乖地, 今年會勤做運動, 食多d 生果蔬菜, 再唔係睇埋中醫調理, 我都唔想成日病病病架嘛~ 
• 我要繼續食喝玩樂 ─ 湯生, 你要識做呢, wakakaka
• 我要剝左隻智慧齒 ─希望真係可以啲起心肝同埋勇敢d

工作方面:

• 我要開開心心地工作 ─ 其實我都無慾無求, 唔望搵大錢, 只求每日開開心心工作, 輕輕鬆鬆到 target! 若然, 瘟神可以响我生命中盡快消失就真係我响 2009年既最大福份  (我知我知… 好難吖嘛… 係奢望吖嘛… 哼… )

家庭方面:

• 我要同湯生繼續 sweet sweet ─ 快樂不知時日過, 唔經唔覺婚後踏入第七年, 希望果d 乜野七年之癢唔會响我地之間發生
• 我要同屋企人去旅行 ─ 一直都淨係同朋友, 同湯生兩個人去玩, 完全未試過同阿爸阿媽細佬成家一齊去旅行, 諗起真係好慚愧… but, 响黎緊既農曆年我同湯生就會小試牛刀, 同佢地去玩兩日, 雖然只係近近地去澳門, 不過最緊要一家人玩得開開心心, 真係好令人期待呀
• 我要研究下幫蘿蘿搵個妹妹 ─ 蘿蘿係一隻 HAPPY dog, 又貪玩, 成日得佢一個响屋企, 都擔心佢會太寂寞… 所以, 真係要認真諗諗… 仲有, 就係同佢安排 desex 

希望 09 年家人朋友個個健康快樂, 大家繼續 WORK HARD PLAY HARD~

最重要係 “惡運遠離我, 瘟神唔見左, 快樂長伴我”