儀容假．．．享受中

受傷已經一星期啦！！個傷口開始長高到周邊的皮膚一樣高，我估好快好返啦！不過個傷口重好紅，重需要好好保護．

上次覆診醫生都唔係好想俾假我，佢覺得我活動自如，我都表示願意返工，但有一個問題係，我個傷口重要用沙布包住，而以我所知，我地係唔可以包住隻手返工的！個醫生好似半信半疑，然後換咗隻肉色繃帶，叫我返公司試下！

之後我都係唔放心，始終上到機個個都會問你隻手做乜，如果真係影響到做野，大家只會怪我做乜唔放假．．．所以我決定打電話返公司問下！

答案係如我所想，因為外露的沙布繃帶會影響儀容，所以我應該繼續放假，直至唔需要再用沙布繃帶為止！！

公司有一個人係負責員工儀容的，這個職位的第一代掌門人以前都係空服員，每一個入職的空服員，在第一次試制服的時候，只要佢係公司，佢一定會係現場俾意見，亦從中挑選美男美女去幫公司行貓步！現在已經到咗第二任啦！

我打咗個電郵俾這位第二任掌門人，重付上幾張我隻”煮熟咗”既手的相片俾佢參考．佢回覆同其他公司人一樣，重請我返公司俾佢睇下個傷口！攪到我有少少緊張，重要我特登走返公司．．．唉！算啦！由請病假起第一天算起，我十四日內就要把醫生紙交到公司確認，所以我係咪都要返去一次！

我應該好好享受我的”儀容假”！但就好似艾沙妹妹成日話我咁，我的血液裏一定有”工作”，我每日都想著飛出去，行街啦，買野啦，食野啦！！！熱愛這些，也是熱愛工作的一種吧！