毒奶粉

昨日星期天放工經過急症室，見到好多家長抱著ｄ小朋友不斷鼓譟，話要立即找醫生幫他們的小朋友做身體檢查，又嘈又鬧，真是好"熱鬧"囉．．．

唉，雖然我明白家長們好緊張佢地ｄ小朋友，不過都唔好難為ｄ醫護人員先得架！緊張之餘都要有理智，唔好好似大陸ｄ人咁堆晒去醫院就有用，盞嚇親ｄ小朋友！星期日ｄ中心無開，咪等星期一再睇囉，迫晒係急症室做咩喎，ｄ小朋友飲左ｄ奶都一段時間，要有事就已經有事，無事就係無事，要檢查，岩，不過都唔係趕住呢時呢刻囉！

急症室係要輪住睇架啦，咩睇先姐，你地ｄ小朋友都無病徵，梗係要等啦，唔通叫ｄ痛到碘床碘席既病人讓比你地ｄ小朋友做身體檢查先喇喎，你鼓譟人地都識鼓譟啦，而且講都講唔通．如果ｄ小朋友真係唔舒服有病徵，使鬼你嘈呀，醫生都識睇佢先啦！

有ｄ仲攪笑，話點解要比錢睇急症，喂，而家ｄ奶粉係香港政府整出黎既咩，係大陸ｄ奸商呀！唔通你去酒樓食野染到霍亂，你追究既都係間酒樓啦，唔通你叫衛生署賠償比你包你醫藥費咩！

而家出事大家都唔想架，要負責既係ｄ奶粉供應商，佢地先係抵死抵罰抵鬧，不過呢個時候，大家係咪應該先想辦法點樣補救，唔係又嘈又鬧咁搵誰人負責呢？！

唔該ｄ電台報章雜誌唔好再加鹽加醋喇，日日又鬧呢個政府又鬧呢個官員，鬧咩姐，鬧有用咩，件事發生左就發生左啦，大家住係香港，應該同心合力，留返ｄ精神去提議去建造，做市民有權利亦有義務，香港先會更美好．

願所有小朋友都平安無事，願所有毒奶粉都從此絕跡，願所有人都重拾良知理智令這個世界變得溫暖．