你明唔明呀?

       
        Captured from www.maggiemarket.com

哀家睇完31集"宮心計"，R爆個頭 ；未知中途是否有missed，還望眾卿家為哀家解釋解釋．

R頭1 : 阮翠雲之前從未離開過皇宮，請問佢係點樣同萬將軍珠胎暗結架呢？
         莫非在御花園的草叢攪掂乎?      

R頭2 : 粗身大細，但係居然無人發現當時身為宮婢/掌珍的阮翠雲十月懷胎，
　　　 係咪好吊詭?!   

R頭2 : 阮翠雲產子之後，棄於河中而被布公公所救......如R頭1所言，阮司設
         從未離宮，請問此河何來？

R頭3 : 何解只有鍾司制(後來鍾尚宫)可以搵布公公"對食"，但係其他如譚司膳，
　　　 阮司設，劉司珍就要食西北風呢？

R頭4 : 請簡單解釋于洋(劉三好阿爹)在劇中的作用.

R頭5 : 三好乃宮中好人指標，做人準則，但竟然比麗妃喊幾喊，
　　　 就連佢插贜嫁禍萬夫人都可以既往不咎；助紂為虐，係咪痴架？

R頭6 : 去到last，R頭嘢就更多
         三司以為飛燕會做無間，點知反過嚟要坐牢等死，
　　　 麗妃見三人快瓜，一心諗住到牢房爆大穫，將自己的惡行一五一十講晒!
         諗住佢地都無仇報喇卦!

         咁麗妃就講喇! 布吉祥係佢殺既! 布公公死果陣連一眼都無望過佢......
         then.....點呀? 鍾尚宮, 阮司設同譚司膳佢地唔知麗妃點解要殺布公公
         架喎!

         奇怪喇! 當時佢地3位就只係顧住追打麗妃，無諗過要問原因嘅？

R頭7 : 德妃因為有左龍裔，阿靳大人蔣將軍都話唔掂得佢，咁佢地就將德妃軟禁
　　　 响自己個竇度喇! 此時馬大將軍就同麗妃講：
         話就話將德妃軟禁以保龍裔，
　　　 又有邊個會估到德妃會唔會深宮自省，畏罪自殺！
　　　 言下之意即係馬大將軍會派人做瓜德妃咁話啦!

         奇怪喇又! 睇落去完全唔見馬大將軍有take action喎?! 

         end up係麗妃見自己實死冇生, 先至諗住搵飛燕落毒响德妃碗粥咋噃!

R頭8 : 吉針，平安符＆麗妃唔使死呢三樣嘢有咩關係？
          就算唔使死, 都可以押入天牢啫! 使唔使咁厚待佢，仲要比個宮佢住，
　　　  又唔褫(音:恥，千其唔好學try my breast 的陳克勤先生咁讀為"遞"音)
          奪佢妃子的身份；大佬！皇太后都係比佢對林架喎！馬大將軍話齋，
　　　  皇上的天威何在呀？　

R頭9 : 點解馬大將軍咁易就比麗妃對林? 佢唔係識武功架咩?

R頭10 : 唔係向外公佈德妃身懷龍裔架咩? 乜走得咁容易呀?

R頭11 : 大堆頭製作，點解得１，２，３個妃子呢？　

R頭12 : 唔明點解高顯揚唔死得唔緊要，因為哀家都好唔明點解萬將軍拱都
           可以救得返．
　　　　

講住咁多先，做埋少少嘢就收工喇！