3個月啦

個幾月無update 過個blog，我整個10月都係忙返學 - 唔係話要學特別嘢，只不過係上咗個專俾我哋呢啲so call "skilled migrants"的課程。上堂點都有啲嘢學，不過對我來講最重要都係識吓朋友，起碼宜家都多咗幾個朋友可以飲杯咖啡、睇戲、放假一齊搵地方去 ... 我比較熟的朋友係來自秘魯(x2)同埋印尼。另外一個得著就係個老師超好人，好似阿媽咁關心我哋。

10月我都見咗兩份工，不過踏入11月就無聲氣。有個同我差唔多時候來的同學(係Russian，英文差啲)一路都無機會interview，估唔到佢係個programme臨完時見第一份工就見成咗，佢仲要係第一個見成perm工的人。我哋當然替佢高興，因為我哋全班互相之間都好supportive，只不過我自己都down咗幾日 -- 我都好想咁好彩 ... 我相信我哋個個都有付出，但係收穫如何就點都需要靠啲運氣。

上最後一禮拜課程時咁啱我daddy mummy來探我，不過佢哋唔係留咗好耐，皆因我俾唔到地方佢哋兩個人住，所以只係留咗6日。我好辛苦先諗到幾個佢哋未去過的地方，同埋都唔算係咩名勝古蹟，唯一係去到嗰啲地方都咁啱撞到有特別events，都算好彩﹗其實我來了3個月話長唔長，不過我daddy mummy已放聲氣叫我返去。我諗住佢哋見到我應該放心啲，點知返到hk我daddy竟然晚晚瞓唔著 ... 我搵唔到工反而仲係其次(畢竟都只係3個月)，佢係覺得我一個人係呢邊好慘，成日自己一個人係屋企、一個人出街、一個人食飯 ... 好寂寞。無錯呢段日子真係難捱，關心我的人都唔係身邊，但我覺得佢諗多咗囉﹗不過佢哋作為我父母，唔係咁諗可以點諗﹖當初我走時無諗過情況會差到咁，宜家我唔單只擔心自己，仲要擔心返佢哋轉頭。睇怕呢個vicious circle唔等到我搵到工都唔會好轉，同埋都只不過係"好轉"，唔等如會完結。