準戰十公里

其實我今次唔係得個講字架，喺9月嗰陣（仲未開始報名），我就已經開始練習，不過……都係講緊一個星期去一次 physical 跑步……，仲要係跑 30 mins 咁多多……，都係嗰句啦，平日我好日都唔郁動吓，而家咁樣跑一跑，都真係攞左我條老命架喇……！

大概跑左成個月（講到好似好多咁，其實一星期去一次，咪即係三四次左右），都已經慢慢有進步（我覺得）……，進度如下：

第一次嗰陣，真係跑左 5 mins 已經想整停部機，不過我見自己跑左 1k 都唔夠，點樣停？？唔得，幾辛苦都起碼要跑 30 mins……，好，我捱，10 mins﹑15 mins﹑20 mins……好辛苦……，最 last 嗰幾分鐘真係想死！因為初次練習，我唔太在意我跑左幾遠，我係想自己可以 keep 住跑，練吓氣先，所以唔記得跑左幾多！

第二次，想自己有多少進步，所以今次個 target 係跑 35 mins，雖然都係辛苦，不過頭 10 mins 係輕鬆左！

第三次，除左練氣之外，步速都唔可以太慢，講真，急步行兩個鐘都冇意思，所以今次都係跑 35 mins，不過速度加快左少少！

第四次，今次順左好多，初段一路睇新聞（電視），一路跑，唔覺唔覺又賣廣告，睇完新聞都跑左 30 mins 有多，雖然辛苦，不過都仲可以，諗住再跑吓，捱得幾耐得幾捱，最終 38 mins 跑左接近 5km！

正當我諗住加緊練習嗰陣，我竟然……拗柴……！

其實整個 PK 過程我都真係唔知發生咩事，我淨係知，嗰日我食完 lunch 喺餐廳出嚟，落樓梯嗰陣唔知點解失平衡（其實講緊都係一級樓梯咁大把），我唔係齋仆咁簡單……，本身我面向馬路，最後係背向馬路咁落地，最慘就係間嘢門口整緊路，我仲要撞埋去 D 鐵欄度……，當時我個同事埋緊單，都未知咩事，喺門口有幾個人扶我起身，不過隻腳當時真係好好好好痛，我嗰刻行都行唔到，要企左陣先郁得，平時 5 mins 嘅路程，我嗰日行左 15 mins 先返到公司……！

講真，而家都仲有些少痛，不過一般嘅行路同埋跑步都 OK，係有時將隻腳拗去某一個位就特別痛，咁樣樣，我都唔知要唔要去睇醫生……！

唉，就係咁樣，成個十月停止練習……！