挑戰神山 玩轉沙巴．三（上）

26 Jun 2009

今日一早就起身，執好基本行裝，就落去食早餐，因為我預計得到，往後兩日都應該冇淡好食，所以今朝食左個 ok 地豐富嘅早餐，不過……呢個早餐真係差 D 害死我……！（大家一路睇就知架喇）

的士阿叔好準時 7:30 就嚟接我哋，唔知係咪佢睇得出我哋個死樣係未瞓醒呢，佢今日好似異常地安靜，成程車都冇乜點出過聲，反而係我哋主動咁叫佢第二日嚟接返我哋，其實佢開價都係 RM120，比市價都係平 D，所以我哋好快就達成共識！

大約 9:00 左右就到左神山國家公園入口，唔知係我哋遲左定係咩原因，周圍好似冇咩人咁，正當我哋想辦登山手續嘅時候，有個中國藉嘅女子主動兜搭我哋，原來佢係市中心嘅 tour guide（佢唔會上山），佢有幾個客都係要出發上神山，所以想問我哋一唔一齊 share 個 tour guide，我哋就梗係 OK 啦，因為就算佢唔問我哋，我哋都有機去問人，而且呢個女子又識講廣東話，兼且又好主動咁幫我哋攪好晒 D 登山手續，我哋都不知幾開心 tim！

佢四個客全部都係外籍人仕（下稱”老外”），係兩對情侶，而佢哋叫咩名，就真係好對唔住，我唔記得左……，因為同佢哋唔係咁熟，而且佢哋 D 名好難記（有條友唔知係意大利人定係法國人，個名又長又難讀）！其實佢哋都幾 free，因為佢哋打算用半年時間周圍去……，唔洗做又有得去玩，真係爽呀！同埋佢哋上山係冇預早 book 定，係今日先 walk in 咁嚟（因為點都會有 D 人係 book 左，又而唔嚟，有 D 人就會咁樣執到死雞喇），你話呀，呢 D 咁自由自在嘅生活真係邊度搵呀？？（本身因為唔夠位，佢哋淨係得兩個人上到山，但係唔知點解，攪攪吓又可以四個一齊出發……？？算啦，唔好理喇！）

之後就去會合我哋個 tour guide，佢叫 Anthonius！攪完一大堆嘢，差唔多 10:30 先真正出發！

首先我哋要坐 10 mins 車去到登山起點（Timpohom Gate）！喺車上面，除左我哋六個人之外，另外仲有一 team 人，係三個新加坡阿叔（下稱”坡叔”），佢哋見我哋兩個女仔都冇請 porter 都覺得好驚訝，仲再三咁問我哋”are you sure?”，當時嘅我仲好肯定同埋好有型咁答佢”sure!”……，不過不出半個鐘之後，我就已經對呢句說話感到十萬個後悔……！

今日主要嘅行程係要行 6km，由 Timpohom Gate（1866m）行到上 Laban Rata Resthouse（3273m），大約每隔 0.5km 就會有個 shelter 俾大家抖抖！我本身個 target 就希望喺 15:00 左右上到去，因為我想玩 via ferrata，而玩呢項活動嘅首要條件，就係要喺 15:30 join 到個 briefing 先有得玩……，所以……我要加油呀！

穿過左個閘口，就正式向神山出發！漫漫長路，俾我第一個驚喜就係一條長長嘅樓梯，其實行樓梯我預左，不過我勢估唔到……條樓梯竟然係落……，唔係嘛？我明明要上山，你而家一開始就要我行落去，咁即係我轉個頭又要行返 double 嘅路程先可以還原基本步啦……激死！

開始行冇耐，我就已經覺得條氣好唔順，好似點吸都吸唔到氣咁，而 D 呼吸聲就大到呢……（扯晒蝦咁），嗰陣真係好鬼驚，因為我見個個都冇事，好似淨係得我一個係咁誇張，唔講 D 人分分鐘以為我哮喘發作……！

而我同 June 因為冇請 porter 嘅關係，我就要獨自背住我個 5kg 嘅背囊上山，而 June 就仲慘，佢嗰個有成 10 kg……，亦都係因為咁，我哋兩個係成 team 人最尾嗰兩個……！

無驚無險終於行過左 0.5km，去到 shelter 嗰陣真係有少少想死，其實好多人都話，就算去到 shelter 都唔好抖咁多，免得過俾自己太過放鬆，因為抖得太多之後就好難再行……，所以我都係飲左少少水同埋坐左陣咋！喺坐嘅時候，我好認真咁思考過一個問題，就係……好唔好放棄？？坦白講，而家行得唔多，係走就真係而家走喇，如果再行上去，到時先嗌走就真係好蝕，不過當我一諗起大拿拿俾左 HKD 1500（整個神山之旅），冇理由咁快就打柴，係咪先？而且咁樣就放棄，返到香港點同 D 親戚朋友交代先？？為錢又好，為面又好，我都要捱落去！！

行到 1km 嘅時候，可能班坡叔見到我哋兩個個死樣，所以都忍唔住問我哋個 tour guide 可唔可以幫我哋拎嘢（佢哋講馬拉話，易溝通好多），當然我哋要俾錢啦，RM8/kg，不過算啦，幾錢都好啦，命仔緊要……，唉……，呢 D 錢真係唔慳得……！！

放低左沉重嘅包袱，成個人真係輕鬆左好多……，而 June 更加成為我哋 team 人當中，行得最快嘅一個……巧勁呀！！而我，雖然係輕鬆左，不過仍然未擺脫到”辛苦”呢兩個字！！

其實沿途真係冇咩風景好睇，主要係因為我哋行得未夠高，一路都仲係喺森林入面行緊，完全不見天日……，坦白講，當時真係好難過……，行得辛苦都唔緊要喇，最起碼你都俾多少風景我睇睇，當分散我注意力都好呀，誰不知，成段路除左石級之外，就好似咩都冇……！

好辛苦好辛苦，終於都捱到 3km，行左一半，終於都可以食 lunch 喇！其實我真係一 D 都唔肚餓，我咁想嚟到呢個 shelter，主要係大家喺度食 lunch 嘅話，咁我就可以有多少少時間休息！雖然我唔太肚餓，亦都唔想食嘢，不過我都拎左個 lunch box 出嚟（喺登記嗰陣，一人拎左一個），話晒消耗左咁多，係咪都要食返少少落去補充吓！成個 lunch box 個份量真係多到有少少過份，入面有三份三文治，一隻蛋，一件炸雞，一個蘋果同埋一盒荳奶，正常嘅我食嘢都已經唔算多，而家仲要行到半死 tim，我直情想唔食呀，特別見到件油淋淋嘅炸雞，我真係有少少想嘔嘅感覺，不過要行就要有體力，最終我都咬左件三文治同埋個蘋果，飲埋盒荳奶就算喇，我同 June share 左個 lunch box，多左嗰個就俾 Anthonius，因為我見佢冇食嘢，唔知係佢哋慣左唔食定係冇準備，不過既然我哋都食唔晒，就唔好浪費，而且佢都好辛苦架喇，無端端幫我哋拎左咁多行李，加加埋埋都有成 20kg 架，雖然佢有錢收，但係人哋又唔係 porter，同埋，佢冇預計要拎咁重嘢囉，之後我都有問佢，你之前有冇拎過 20 kg 嘅嘢上山，佢話呢次係第一次，不過亦都係最後一次……！

食完 lunch，又要繼續耕莘嘅旅程……！其實我哋行上山嘅同時，亦都有一班一班人咁落山，相遇嘅時間，大家都會 say 個 hi，有時佢哋見到你行得咁辛苦，都會講 D 鼓勵嘅說話，例如叫你 keep going，本身呢句說話係好正面，不過唔知點解，自己聽到嘅時候就覺得好似好唔順耳咁，感覺上佢哋好似同你講緊風涼話咁……，佢哋就開開心心返落山，而我哋就連山頂都未見到……，如果唔 keep 住 going，我都唔知我可以做 D 咩……？所以我發誓，到我落山嗰日，我都一定要同人講…… keep going 啦你！

成條山路，除左遊人之外，見得最多就係為神山工作嘅人，佢哋拎住一大袋一大袋嘅嘢上山落山，有 D 仲抬住大大條嘅木材（因為上面一路都仲起緊 resthouse）！佢哋簡簡單單著住條短褲，踢住對拖鞋，就可以喺山上面來去自如，相比起我哋呢 D 自以為有晒良好裝備，但係都行到成隻狗嘅遊人嚟講，我哋真係……！佢哋上上落落，日捱夜捱就係為生活，但係我哋呢班白痴，行得咁辛苦，究竟又為咩呢？

一路上，June 都會喺每個 shelter 度等我，不過過左 4km 之後，我就叫佢唔好等喇，既然佢行得快，就無謂次次都要等我，而且以佢嘅速度，佢應該可以上到 via ferrata 個 briefing 之餘，仲可以喺上面慢慢抖吓 tim……，既然係咁，我都唔想再拖累佢，所以我決定”分手”，遲 D 喺 Laban Rata 再見啦……！

講起石級又真係可以講兩段都未講晒，一開始嗰 D 都可算係樓梯級，但係愈行就愈高，之後就連級都冇埋，得返一堆堆石，之後就仲離譜，連搵個位踩嘅地方都冇……！

過左 4.5km 左右，終於可以同 D 雲見面喇……！

其實 3-5km，我真係冇咩嘢想講，除左辛苦同埋粗口之外，我諗唔到有其他更好嘅形容詞去表達我當時嘅情緒！

過左 5km 之後，亦都係我呢段路嘅轉捩點……，因為我成為左包底王（成 team 人行得最慢嗰個）……！之前嘅路，我同老外，大家都互有上落，但係過左 5km 之後，條氣就愈嚟愈唔順，行得愈嚟愈慢，唔通……咁快就有高山反應……？我再望望錶，當時已經係 14:30，我仲有 1km 未行，我心諗，我應該都 join 唔到 via ferrata 個 briefing 架喇，既然係咪都玩唔到，不如行慢 D，等自己舒服 D，始終都係嗰句，命仔緊要！！雖然冇得玩真係好可惜（我係因為 via ferrata 先嚟行神山架），不過事實上自己唔掂就真係唔掂，鬼叫自己咩都冇操過就衝上嚟咩……，算啦，下次有機會先再玩啦，最好去 D 唔洗行就玩到嘅地方，咁就 very good 喇！

因為包底嘅關係，我同 Anthonius 就一齊行（佢一定係跟住最尾嗰個人，因為佢要確保成 team 人，個個都能夠順利上晒去），唔知係咪放棄左 via ferrata，時間上唔洗咁趕，成個人都輕鬆左，我終於識得講嘢……，我一路行，一路問埋佢 D 無聊問題，例如問佢仲有幾耐？仲有幾遠？呢段係咪已經最辛苦架喇？……，其實我自己心中有數，不過都想佢呃吓我，等我多返少少求生意志……，不過佢真係好鬼坦白，次次都係老老實實咁答我……激死！

15:30 終於順利到達……！（我隔離嗰個就係 Anthonius，而我身後嘅就係我今晚要住嘅地方 Laban Rata）

Anthonius 真係好好人，佢見到我個死樣咁辛苦，所以佢都好醒目咁走去幫我 check in，而我就坐埋一邊等佢……！喺搵位嘅同時，終於見到其中一個坡叔，佢示意我坐過去（佢竟然有心情嘆咖啡），佢仲好親切咁問我洗唔洗飲呢樣飲嗰樣，不過我真係咩都唔想飲……，唔知係咪佢以為我太攰唔想行去拎，所以佢竟然好主動咁走去幫我拎左杯熱茶……，雖然我真係唔太想飲嘢，不過呢杯熱茶真係好窩心！

之後佢另外兩個朋友都陸陸續續咁抵達……，原來我都唔係最慢嗰個……！（其實幾個坡叔嘅年紀都唔細架喇，冇50都有40歲……，而我嘅體能只係接近佢哋呢個 level……）

Anthonius 終於返嚟喇，佢幫我攪好晒 check in D 嘢，好感動呀！

一開門，見到張床，我真係想喊……！

成間 Laban Rata 得兩間雙人房架咋，而淨係雙人房先有獨立 toilet 架，不枉我早半年就 book 定你呀！

惡夢未完，待續……