生命最後一個月的花嫁 (April Bride)

12 Oct 2009

其實我真係好怕睇 D 喊苦喊忽嘅戲，皆因我本身就已經極度眼淺，就算大家唔喊嗰 D，我都會睇到眼濕濕（成日要靜靜雞咁抹眼淚）！如果係呢 D 必喊嘅戲就更加唔在講，流眼淚都係事少，最慘就係想喊但係唔可以喊出聲嗰陣先最辛苦（你冇理由嘈住人架嘛），扯晒蝦咁，睇完套戲好似跑左 10km 咁辛苦……！

所以我都好耐未睇過呢 D 咁嘅苦情戲，我唔睇，唔係因為我唔鐘意睇，只係……我覺得睇完呢 D 戲，成個人會好辛苦……！

以前我真係咩戲都睇，《星願》喊到死死吓都要堅持去睇，OK，我仲頂得順，但係再睇埋後期少少嘅《愛回家》之後，我就覺得……，做咩睇戲要睇得咁辛苦……，娛樂咋嘛，應該要開心 D，喊到氣都喘埋，咁又為咩……？所以之後我就好少再睇埋呢 D 咁嘅戲！

但係呢套好似真係好 hit 咁，而且講女性病之餘仲要係真人真事，感覺上，知多 D 都係好事，所以……，我就冒死去睇！

成套戲兩個幾鐘，其實早段真係有少少悶，好想瞓……，不過整體上都好 OK！

睇完戲，去左 apm 個 food court 食飯，食食吓，又播呢套戲段 trailer 出嚟……，一路食一路喊，嚇死人……，不過……，其實我係諗起我嘅好朋友，我有 D 掛住佢！