挑戰神山 玩轉沙巴．一

24 Jun 2009

今次又要北上出發（深圳上機）……，冇法啦，因為 airasia 夠平嘛，我買呢個 package，來回機票加 6 晚酒店都係 HKD 3600 左右（雖然間航空公司 cheap，但係我哋話晒都住 Hyatt 架）！

雖然要去深圳飛，但係好彩個時間唔算話好早，所以慢慢上去，食埋個早餐先上機都仲有大把時間！

唉……，不過講起 airasia 又真係有少少苦水要吐……，可能係因為佢係”廉航”啦，所以本身佢個登機閘已經俾人放逐到鬼死咁遠架啦（其實 airasia 喺 HK 都係咁，佢個 counter 都喺 T2），但係估唔到連個 check in counter 都搵到你死……，我哋要去 138/139 個 counter 架嘛，但係搵晒半座嘢都唔見，最終就梗係問人啦，原來喺另一個 terminal，咁都唔緊要啦，行去另一座 building 都唔係難事，但係去到嗰陣，竟然連一個 counter 都冇（因為好細，一眼望晒架喇）！

正常嚟講，你係要喺 counter check in 晒，放好晒行李，咁你先入閘架嘛，但係呢度喺掉轉（其實唔係深圳機場嘅問題，係 airasia 嘅問題，因為我之前坐南方航空，佢 D 程序都好正常架），你要入左禁區先會見到個 counter……，真係攪笑！！

唔知係咪”廉航”嘅關係，連個 boarding pass 都好似好兒戲咁！！

自備口罩（老細喺日本買返嚟俾我……，唔好諗住佢咁好死，其實我估佢係驚死，驚死我傳俾佢就真）……，為左自己嘅人生安全，都係小心 D 好！

九萬樣嘢要填！！

架機唔知發生咩事，無端端噴煙出嚟，當時我都真係驚一驚，你知啦，唔知係架機出事，定係有恐怖分子放毒氣……，最終……原來係冷氣，真係嚇 Q 死！！呢個場面其實現場睇真係好震撼架！

沙巴……，我嚟喇！！

房入面有個大露台，望出去仲有海境睇架！！

settle down 晒所有嘢之後，就出去走返轉，順便搵嘢食！

萬寧……沙巴版！

呢個粉麵係我喺沙巴食嘅第一樣嘢！

初初嚟到嗰陣，都諗左好耐，究竟好唔好喺度食嘢呢……？因為呢度個衛生環境真係麻麻，好驚食完會痾……，不過話晒呢 D 都係地道嘢，唔食又唔得喎，所以最尾都係食 D 麵面同埋雞翼咁，因為夠穩陣嘛！

呢度都好多海產，不過唔係生猛囉……，初時都諗住算架喇，海鮮呢 D 高危嘢，真係可免則免（就算係食，都上完山，又或者係臨走之前先食啦），不過呢度 D ”老虎蝦”真係好吸引，因為佢真係好大隻架……，最終都帶左佢返酒店（死就死啦）……！