甘乃威與生果日報

甘乃威事件全城哄動，但講真，我冇咩興趣。

人地同女助理之間嘅感情事，關你地鬼事，只要不涉及性騷擾，人地鍾意搞婚外情，鍾意示愛，鍾意表示有好感，同你班三姑六婆有咩關？

因為他是議員？咁又點？議員都係人，都有軟弱的一面，最大問題佢不是做傷天害理，有失職守的事，或者啲三姑六婆又話咁佢求愛不遂，炒人就唔啱。

大哥大姐呀，你識個女事主咩？佢親口同你講架？而家只係傳媒一面之辭，究竟邊個啱邊個錯，而家都冇人知，你地幾時做咗法官，一審定案架？

甘乃威又衰蠢，出黎認衰咪算囉，遮遮掩掩把鬼，結果咪越搞越鑊。

認衰仔，認自己太感情用事，唔識得處理，相害咗人，咁咪得囉，最多俾人話你唔識處理感情啫，唔會話你失誠信吖嘛，更何況，有啲嘢冇分對錯，尤其係感情世界。

民主黨又衰鈍，頭頭大佬何俊仁，好似唔急機處理麻麻咋喎，點做黨主席呀？越來越民建聯化唔得噃。

生果日報直頭亂咁吠，社論就扮中肯，頭版就係咁挫，精神分裂啦，肥佬黎今你次自取滅亡，唔駛行家打你，自己冚頭埋牆。我第一個支持唔用錢買你份報紙，喺公司睇算數，慳返d錢。

以後唔駛用錢買的報紙繼東方太陽星島成報新報經濟文匯大公之後，又有蘋果，全部都係垃圾報紙、九流文章。

免費報紙唔入流。

香港剩返信報睇，阿們。