香港市民勿當奴，一定要爭取雙普選，香港市民已到了最危險時刻！

大學兼任講師李偉儀。（蘋果日報）

大學兼任講師李偉儀：「 05政改方案好似一件壞咗嘅食物，你走去翻叮，一樣會食壞人。（立法會）功能組別你唔取消，反而仲增加名額，明益民建聯。我由 91年讀大學就開始爭取民主，依家教書睇到新一代對普選同樣焦急，真係等到頸都長， 2012真係唔可以再拖！」

香港業主會會長佘慶雲：「增加功能組別係咪真係代表到巿民心聲？我夠代表好幾萬業主啦，既然係咁應該業主有個代表、租客都有個代表入立法會，綜援戶都應該搵人入立法會啦……依家功能組別做咩啫，咪就係利益輸送囉，真係咪當我老襯，心中有數，大家都知你政府玩緊咩啦。」

中學生聯盟臨時執委會主席余煒彬。（蘋果日報）

中學生聯盟臨時執委會主席余煒彬：「好明顯係 05年政改方案翻版、炒冷飯，增加功能組別根本達唔到最終普選嘅目的同平等嘅原則，我哋主張廢除咗佢；話就話第時由區議員互選，貌似有間選咁，但佢哋冇一個廣泛嘅選民基礎，我哋都唔贊成，呢個方案我哋梗係唔收貨啦。」

社工謝世傑：「功能組別加議席，根本唔係將民主成份擴大。議席表面上多咗，只不過係政治化妝、塗脂抹粉，咪一樣係某啲人一人兩、三票。如果能夠消除分組點票，立法會先唔會成日都係多數人贊成嘅嘢都被否決。特首選委會人數增加，咪都係小圈子選舉。」

77歲長者郭矢賢。（蘋果日報）

77歲長者郭矢賢：「民建聯咁多區議員，多咗功能組別佢實贏喎！保皇派如虎添翼，咁我哋小市民永世冇直選，有共產黨一日，我哋就冇直選一日。特首選舉咁安排，就算畀你市民選，第日咪一樣『董煎話』、『董煎話』（董建華國語諧音），個個衰人咁畀你選。」

工程師陳啟遠：「我完全唔贊成呢個政改方案！兜兜轉轉，以為向前行咗，其實係一個倒退，唔係邁向普選。我哋要完全取消功能組別，依家 30席都咁難取消，你再整多五個，真係易請難送。我雖然係直選區議員，但係呢個方案冇達至普及、平等，就算你明益我，我都唔支持。」 

今年 7月 1日， 7.6萬人上街遊行，爭取普選之聲此起彼落。（蘋果日報）