永遠的刺

前晚細佬致電告訴我老豆要將娘家出售，事情終於發生了，這些年來也提及好幾次，只因阿爺阿嫲在世而反對，現在已經無人可以成功阻止事情發生了。因著這事，細佬與老豆的沖突也增加。今次也事在必行，除非沒有買家。細佬話老豆比三個選擇佢：

1. 賣屋，之後比20萬佢自己買樓

2. 以80萬賣比細佬

3. 賣屋，比佢間公屋細佬換居屋，但緊係自己供

我哋商量過都要順佢意，選擇1應是最理想。最近返去發覺這幾年樓宇質素下降得好快，細佬雖然有維修但同之前差好遠。對面屋相信有精神問題，經常大力關門，門框的磚幾乎要跌下來，與他相鄰的牆也滲水滲得很厲害，就算保存舊居，相信最多住十年。若換居屋，都有老豆個名，日後有很大危機，所以唯一選擇1叫最好，危機是賣屋後，不給細佬分文。其實無論點，細佬都要搬，我們話咗佢可以來一起住，唔知他會不會這樣做。

除了不開心老豆多年來拿盡阿爺阿嫲的錢，對屋企卻沒盡任何責任，次次都話要錢做生意，錢就越要越多，生意也冇次做得成。更加不明白何以到五六十歲都不能吸取多年來的教訓腳踏實地做人。最激氣是拿了阿爺阿嫲咁多錢，也不孝順他們，生活也不豐足，好像將所有倒進大海般。錢真的這麼重要嗎？連家人都不顧？但願他這次做生意又好、投資又好、還債又好，希望賣屋後能解決他的經濟需要，而且能過得好一點。

其實我已超過一年沒有見他，細佬仲有見佢，但相信賣屋後，佢會完全消失，不會與我們聯絡。唉，同老豆的關係是生命中的一條刺。每當聖經教訓要孝敬父母、要與人復和，我卻永遠應用不到。神啊，何以你要給我一個這樣的家庭？你要我點做呢？要修補關係並不是我能力可以做到的，且所聽到的，全是他的不是，我怎能「愛」他呢？。回想從前，我實在是愛他的，但卻因而被傷害極深，也流了許多眼淚。神啊，我還要愛他嗎？