港燦中環一夜遊

星期天，與劉大小姐、友人Alan及Mandy一行四人相約到中環晚膳，不過之前當然要朝聖一下！

港燦中環遊，第一站：

　　呢間嘢認真唔講得笑，之前經過幾次都見到一班羣人喺門外排哂長龍等入場。我初時以為啲人新屎坑係唔係都要去貢下咁啫，但當我同劉大小姐入到去行一轉之後，明哂！貨品種類繁多：童裝、優閒服、行政服裝、飾物．．．．真係乜都有，仲要價錢一啲都唔貴，多數貨品連一佰蚊都唔過！有見及此，我同Alan都各自有收穫。

我嘅戰利品：

HK$49.90咋，女人街都唔得啦！而劉大小姐就話要等熱潮減退些少先至入貨；咁又係，一陣行過一條街同五六個人撞衫又真係幾肉酸～

8:30pm　行到肚餓，夠鐘食飯！

港燦中環遊，第二站：

中環SOHO區 - 南蠻亭

「南蠻亭是一間專門供應串燒的日本料理，在香港已有十四年歷史，串燒最初在日本只是一種街頭小食，後經渡邊榮三先生鑽研後，改良了串燒的技術，之後這種街頭小食得以進入餐廳，成為另一種大受歡迎的日本料理。南蠻亭的廚師，每天都會親自到市場，選購一些新鮮的材料作為當天的廚師推介，另外，他們也有來自法國空運到港的鵝肝和紐西蘭的羊扒，全部用料都不經醃製，在爐火上燒烤時才作調味，以保持食物最新鮮的原味。除食物的用料外，南蠻亭最注重的是店舖的氣氛，在南蠻亭工作的上上下下，都極樂意和客人溝通，意在營做一種輕鬆愉快的氣氛，令客人有賓至如歸的感覺，亦因此南蠻亭的客人中，有不少都是熟客，其中大部份都是年輕人，他們都是愛在南蠻亭這種隨意友善的氣氛中，邊飲邊吃着廚師即叫即做的串燒。南蠻亭有供人客申請的VIP會員卡，持卡者可享有特別的折扣優惠。 」

引用自 http://www.esdlife.com/household/chi/cook/directory/detail_compassvisa.asp?id=1240

不過以上都唔係我哋去果度晚飯嘅原因，我哋嘅主要原因係佢：

阿豐！

　　大家見到呢個擁有咁雄偉背肌嘅就係阿豐哥喇！阿豐佢貴為南蠻亭嘅二廚，亦係我同Alan嘅多年老死（史丹利讀中二果年識佢，你話幾耐～）。之前從阿豐口中經常聽到佢話佢公司食物嘅選料幾咁上乘、自己燒嘅嘢又幾咁好味咁，聽就聽得多，終於有機會試下！

阿豐果然所言非虛！攪到我哋四個以狂風掃落姿態食咗無數好嘢落肚！雖然冇試到阿豐口中經常提及嘅　他他牛、鵝肝、蝦 等等傳奇食品，不過我同劉大小姐都覺得其他「普通嘢」都好得，例如：牛脷、粟米、羊扒、雞翼呢啲。

同行另一對情侶 Mandy & Alan；佢哋將會喺幾個月後正式拉埋天窗，恭喜哂先！

我同劉大小姐嘅戰績：

飲飽食醉，埋單．．．．．一句講哂：「唔該哂豐哥！」

本來之後仲想去XTC整杯雪葩做甜品，不過個肚冇哂位喇，惟有撤退。

港燦中環一夜遊，到此完結。