妙哉! 火窩歷奇!

承H 氏所文...

當我地極速咁掃咗 "等人齊叫住先" 嘅豬骨煲同美國肥牛(大) 之後

我地就開始order 重點要食嘅鮑魚/ 象拔蚌/ 生蠔/ 醉雞...

突然一班男人走入嚟, 個個陀住趴屎著住黑色背心, 一睇就知係差人. 喺呢個位我想提一提就係, 呢班差人嘅造型唔係 << 無間道 >> 入面劉建明果種; 而係TVB 啲劇入面通常由大口青或者好少少會係梁家仁做果種, 簡單啲可以叫雜差. (呢個term 都離開咗我地好多年...)

班阿sir 叫我地攞晒身份証出嚟, 全場都好合作. 之後嘅半個鐘頭, 大家都好靜, 湯繼續滾, 酒繼續飲, 嘢繼續食, 如果張枱仲有嘢食嘅話...

問題嚟喇!! 阿sir 入嚟咁耐, 全場阿姐同啤酒妹都唔見晒, 我地開始估間嘢發生咩事, 有人話:

- 可能請黑工 (最有可能);

- 可能俾人投訴唔乾淨俾人查牌 (咪住先! 唔係應該係食環署嚟咩!?);

- 有人投訴食煙 (唔係有個叫咩控煙辦咩? 一個都冇嚟喎??);

- 有某江湖大佬嚟食飯, 差人叔叔嚟做場大龍鳳 (朕最中意同期待呢個答案, 幾鬼有戲味).

前後成九個字都有, 一個阿姐都冇入過嚟, 冇嘢食冇酒飲. 我都忍唔住出去外面八卦吓. 出面企住大班差人同 EU 車; 一連三個舖位除咗我地身處果間開住門之外; 另外一間閂咗門入面發生咩事都唔知; 而望入出中間舖位(廚房) 就見到全場啲阿姐一字排開版查緊身份証. 見佢地個個都頭耷耷好似瀨咗嘢咁, 都唔知會唔會一陣俾人塔晒返去. X! 咁我地食咩呀?!

見勢色唔對, 就即刻叫揸車嚟嘅兄弟去攞車, 同打電話叫仲喺入面嘅兄弟 "出門口轉左一直向前行, 就會見到我地", 又係好有戲味!

我地就咁食咗霸皇餐, 雖然兩成飽都未夠. 而見到我地全枱動身, 另外都有幾枱人跟住走.

我地之後一行九人驅車去咗佐敦食牛皇星. 食物依然ok, 但係湯底就一般.

醉雞窩不過不失.

蕃茄薯仔湯唔掂!!

可能因為食食吓斷咗道氣, 今次men's meeting 冇之前氣氛咁好咁爆. 真係要嗱嗱林搞多一次!