蒼涼故事

最近兩則虐兒新聞,
真係令我 “火起”!
一則係 4 歲女兒被媽媽打至皮開肉綻, 手肌肉幾乎壞死;
另一則係女嬰俾爸爸丟入熱水鍋, 命危。

或者自己未有子女, 口輕輕,
覺得再唔開心, 再難過, 再天大嘅理由, 都唔可以咁做。
我好質疑有啲人係咪無諗過要愛佢哋嘅子女,
係咪根本無資格做父母呢?!

有人會話 “有時啲仔女唔聽話, 又真係好激氣嘅!”
同意! 我唔否認, 甚至有限度嘅體罰, 我都或許接受到,
但不顧後果, 失去理性咁攞子女出氣,
到最後嗰啲父母得到咩呢?
或者子女一時三刻會聽你話,
但以後呢? 當佢氣力大, 或者會反抗, 以暴易暴,
或者會討厭呢個家, 離家出走……

我住嘅地方, 不時聽到小朋友慘叫,
雖然唔肯定係咪有爸爸媽媽打小朋友,
但聽到, 會聯想到虐兒, 心會一寒。

其實好好愛錫小朋友,
用心管教佢哋, 做法唔係更積極咩?