生日一肚氣?!

要介紹相機? 非也。

呢部 Sony DSC T-200 係我送俾 "大朋友' 嘅生日禮物。不過, 事實係 "大朋友" 都出咗唔少錢。其實我哋嘅心水相機有兩部, 分別係 Canon Digital IXUS 860 IS 同 Sony DSC T-200, 前者有質素保證, 後者款式新穎、功能唔弱。

講到買相機, 就不得不提背後嘅故事。話說唔想我破費嘅 "大朋友" 同我到處格價, 去過好幾區, 最後因得陌路人出口相助, 我哋最終決定喺屯門嘅 DSC 直銷中心買。可惜一切傾妥之際, 至發現冇 "大朋友" 喜歡嘅紅色, 於是售貨員落嘴頭想我哋轉買其他顏色, 但當然啦, 作為一份生日禮物, 又點能夠輕易改變主意呢! 於是售貨員又出主意話可以訂貨, 仲表示 3、4 日就「返貨」, 更可以應我哋嘅要求改喺其他分店取貨。咁好喎, 當然落訂啦!

誰不知等了又等, 已經一個星期都冇聲冇氣, 睇住一日一日過去, "大朋友" 生日都冇禮物收, 真係絕對接受唔到!!!! "大朋友" 打電話去追問, 得到嘅答覆係「啲貨返唔切, 未知幾時有貨」。想退訂?? 但客戶服務方面指公司唔接受退訂, 甚至退訂嘅事要直接聯絡番售貨員商議...聽到咁嘅回應, 真係氣頂!! 售貨員當初為求做到生意就乜都答應, 之後就不負責任, 仲要俾我覺得公司嘅客戶服務蕩然無存, 激到向來敢怒不敢言嘅我都唔再同佢客氣, 投訴電話一個又一個, 期間嗰個售貨員仲想游說我改買其他顏色, 喺堅持退訂之下, 對方答應退回現金券。既然退訂嘅事可以確定, 我同 "大朋友" 都鬆一口氣, 當晚更隨便揀間舖頭, 成功將心愛相機買下。

我哋真係唔好彩! 不過原來呢啲事唔算得上偶然, 上網時就見到有人留言指喺 DSC 直銷中心訂家俬遇到相似情況, 似乎可以推斷呢間公司嘅營業手法不當, 大家惠顧呢啲舖頭嘅時候, 一定要格外小心!