我好唔開心的一件事

小妖們，由上個禮拜開始，我都覺得唔開心，原因係因為我同所謂『家人』的關係起了點變化！

一直以來，我都覺得朋友同家人都好重要，兩者缺一不可，如果發生左事，對『朋友』應該互相分享互相幫助，對『家人』更應無私，係能力範圍內應該盡幫。

人越大，經歷多左以後，對『朋友』已經無之前咁信任，覺得凡係人都是會以自己的利益行先的，暗算、出賣、利用都會係朋友身上出現的，就算你真心對人好，人地無必要對你好的。幾次下來呢，我學識左保護自己，所以會將朋友分類。

但對『家人』我總覺得他們係我最大的後盾，最佳的支持，家人間係會自自然然咁企係同一條線上面，互相幫助，做對大家好的野。所以，只要發現到家中有任何一個人有問題，每個人都應該盡力去幫忙的。可惜，事實原來唔係咁樣的，人始終都會以自己為先，只係想你扮幫手讓自己好過。改變我呢個睇法的，係一個我以為佢會支持我的阿姨。

由細到大，我同一班姨姨的關係都好密切，我認為佢地係世界上面除左自己家爸爸媽媽細佬之外最親的人，細個媽咪偏心，疼細路唔疼我，佢地會聯手幫我對負林思捷，我話過我會盡自己的能力去錫返佢地的。

二姨同拉姨的生活比較自由，所以我同二姨拉姨的關係一直都好密切，每個月起碼都會見到三四次，三姨因為有自己的家，要顧及的野多了，相對見的時間就少好多喇。佢有兩個女，大果個好比心機讀書，從來都唔駛其他人為佢擔心的，會考成績仲幾好添。相反細果個呢，就由細比人縱到大，成績唔好又唔肯努力，做表姐我的，係有能力的範圍低下，當然係會幫阿姨教佢啦！之前已經試過好多次教佢教到嘔晒血，話要放棄，亦用自己所謂的『專業知識』同三姨講過好多次要點樣教，每次到尾佢地都唔聽，仲話要幫個女話返我添！呢件事我一直都無忘記，我嬲到講明唔會再理的喇，但o係阿姨勁愁的樣底下，放棄完又幫，幫完又放棄都不知有幾多十次，結果大家都估到的啦。

直至今個星期日，我叫o左我果位自以為讀書無問題的表妹來我家，將上學期期考的卷重做一次，佢當然好乖咁坐o係度做啦，做完我同佢對，發覺佢錯的野同佢做卷時所錯的一模一樣，我當場火起啦，我比足兩個月時間佢溫習（流感假的時候我已經同佢講佢要溫書，仲比我發現佢o係要對果份卷上面塗填色，亦正正式式咁同佢解釋講過唔可以咁樣，警告過佢要利用暑們好好攪清自己點解錯的喇喎！）佢而家竟然錯成咁？英文卷百一分滿分只係進步左十四分，錯的竟然係同樣的野（連串錯字都一樣）！有無攪錯呀？

問佢有無溫書，佢話有，溫足兩個星期，家姐當場就督爆話佢一分鐘都無拎起過本書！我問佢點溫，佢答我上網溫，我叫佢開比我睇，佢就話無得開，我唔信，叫佢開，佢先話佢自己講大話，佢係咪當我白痴的呢？做左D咁的野，有無可能唔比人鬧？我鬧佢，佢竟然話佢想死！用死來大我！我又真係會比佢大到喇！不過我阿媽無！佢比我阿媽鬧完，態度就更差！我地唯有派善解人意的拉姨出場啦，結論係佢唔鐘意比我鬧，覺得我對佢的要求好高！進步左十四分（都只係得77/110分）都仲要鬧佢！我嬲起上來行入房，叫佢有野自己兜口兜面同我講，佢就同我講：「我好唔鐘意你鬧我，請你以後都唔好理我！」果一刻我比佢激到想死，就叫佢出廳係一大班人面前再講一次，點知佢出到去，就話比其他人聽我迫佢咁講！哈哈哈！演技出神入化啦！我再無o野好講！但更無o野講的事陸續有來呀！

我打比阿姨話比佢聽件事，叫佢好好教訓佢，亦提議o左佢唔好比佢再打機，結果係？

阿姨叫佢同我道歉，佢話無錯，唔肯。阿姨就叫佢等到佢覺得自己錯先同我道歉喎！幾榮辛呀。第二日，我仲見到佢去我個happy farm度偷野添呀！係咪得到死呢？人地個女仲要過份到話我地針對佢嬲晒我地全部人添，勁呢？而我阿姨o係同其他『家長』的交流之後，都覺得我地的做法唔好！我想問，o係明知我會考佢的情況下唔溫好習加上講大話，係咪要攬住來錫錫到佢想死，之後日日比佢打機先叫處理恰當呢？睇來，我呢個教育碩士，都係白讀的喇，咁都唔識，真羞家。

你地話，而家o的細佬係咪太過份呢？輸打贏要，有著數就要拎，最好有咩野就買比佢，佢地唔駛做好自己的本分架！書又唔讀好，仲要聲大夾惡，話你屈佢。唔比得人話的話點解唔自己做好呢？我好心幫人教仔，仲要比人全家怨，睇來唔死都無用果個係我囉！

你地一定會叫我唔好上心架，上心？哈！以前或者會的，而家唔會囉！只係對自己阿姨好失望，我都唔知點解o係我細表妹的心目中，我由細到大都只有惡死的形象，永遠都只會迫佢讀書。佢開心永遠唔記得我，衰人永遠都只有我做，難道我真係想做一個咁的人？你係我阿姨，要我做醜人來幫你教女，我做！但，唔係一次又一次咁令我失望囉！

我又唔係性羅的，點解要有恆呢？就算有恆都要你配合先幫到佢架！

對於呢件事，我只係覺得心好淡。同時，亦教曉我「家人」原來都要分層次分內外的！我唔想再被利用，再做一個吃力不討好的衰人！

小妖，我比你地知道我發生的呢件事唔係想你地為我抱咩不平，而係相你地知道，你地的身邊總有一個咁樣對你的人，呢個人可能係你阿媽，可能係你阿爸，阿姨、又或者姑姐（大耳仔，我話你呀！）。但我可以寫包單呢班衰人其實比任何一個「好人」都對你好，因為佢地明知你地會嬲你地會憎佢佢都會去做呢個角色，所以請你地o係諗自己感受的同時，都諗下，呢班人的感受！佢地都唔想咁樣對你的，只要你做得好，無人會鬧的！

小妖呀，你地中二的喇，要大個要生牲的喇，千其唔好浪費佢地苦心的經營，知嘛？