由出師表到屈機

"先帝創業未半，而中道崩殂﹔今天下三分，益州疲弊，此誠危急之秋也" 及 "親賢臣，遠小人", 依兩句對於三字頭o既人必然會認識, 難以忘記. 此兩句係出自"出師表". 出師表一文, 以前每年必試, 每個會考生發夢都會記得. 當年中國語文會考要引範文, 無引文唔俾分. 依種死背書o既考試模式, 當時我好反對. 我覺得考試要死背書係無意義, 應該去理解內容, 從欣賞文章之中去了解作者心情及文章目的, 以及學習用句.

估唔到時至今日, 真係無o左死背書, 更唔使考範文. 唔使死背書, 我係讚成. 但唔使考範文, 我就有所保留. 其實d範文, 有古代文人智慧, 可以認識中國o既文學. 依家有教範文但唔使考, 試問重有邊個會去讀呀!!

每樣o野都係道變緊, 中文科會考都唔例外. 今年o既轉變, 一句潮語 "見鬼勿O嘴，潛水怕屈機", 大家都真係估佢唔到. 中文科卷有英文字, 題目用潮語. 其實依兩句係扮潮, "勿"同"怕"依兩字唔係咩潮語. 要潮d, 可能係"見鬼勁o嘴，潛水喪屈機". 出依d所謂潮語題目其實係"超低能, 勁攪笑". 今年出試卷o既老師想迎合年青人口味, 所以試題用上一d年青人常用上潮語. 問題係d老師其實係唔潮扮潮, 最離譜係誤解"屈機". 屈機誤解為"遊戲者因無力取勝而屈服", 依個解釋錯得好離譜, 係錯晒, 錯得好緊要!! d出試卷o既老師唔識扮識去出卷, 依種"知其不可為而為之"o既行為, 係超低能!! 再者, 用潮語亦對d唔用開o既考生唔公平. 好多唔打機o既人, 跟本唔知咩叫"屈機".

估唔到中文科會考試題會由出師表演變到屈機, 真係出人意表, 此料不及!! 大家都O晒嘴!!